Álügüdahani le hadügübei aliihatiña
Ka mini lubéi ‘dereti lan lun Aburemei, larihini hóunwegun ha hínsiñehabubaña lun’?
▪ Chóuruti gebegi lan libagari kada aban hádangiñe lubúeingu Heowá lun. Gama lumoun, dimurei le abürüdǘbei lau ladundehan sífiri sandu, le adarirubei lidan Sálumu 116:15, mámarügü luagu lounwen aban gürigia layanuha, miniti lóugiñe lira.
Lidan aban yanu le ichugúbei dan le lounwen aban gürigia, moun lumuti layusuruniwa bérusu le, lun layanuhóun luagu hilaali íbini aban lan meha kristiánu le úaraguati lun Heowá. Ka uagu? Ladüga miniti lóugiñe lira. Le labusenrubei abürühati Sálumu lariñagun anhaña lan hamuga óunwegua sun lubúeingu Heowá ha úaragubaña aban lan hamuga eferidiruni wéiriti ani maweiyasunbei ígira lun lasuseredun katei le (ariha huméi Sálumu 72:14 luma 116:8).
Chouru lumuti bérusu le mígirunbei lan Bungiu lun ñein lan agumuchaguagüdati hau lubúeingu ha úaraguabaña sunsuinagubei. Ítara liña larufuduni le habürühabei gürigia uguñe weyu luagu le wásügürübei. Sun luwuyeri éibaahouni le awanda wamaalibei arufuda lumuti furangu, luagu óunigira lumutiwa lan Heowá luéi lagumuchun wau sunsuinagubei.
Heowá suntigabafubei, chóuruti lagunfulirubei lan lugundan. Ligíati, maweiyasunbei ígira lun lagumuchúniwa hau lumutuniña sunsuinagubei. Anhein hamuga ígira lun lasuseredun katei le, genegebei hamuga gabafutima hamá láganiñu luéi, ani mítaranti. Anhein hamuga giñe asusereda katei le, magunfulirunbei hamuga lisuuni lun labuinchun Ubóu hau gürigia úaraguatiña lun (Isa. 45:18; 55:10, 11). Meredebei hamuga giñe ni aban gürigia eseriwiduti lun Heowá lidan aransehani le ladügübei, le lánina áhuduraguni inarüniti ya ubouagu. Úabaña hamuga giñe gürigia lun hagumeseruni “iseri ubóu”, lidan amu dimurei, gürigia richatiña ha lúnbaña hawinwandun ubouagu lábugiñe “iseri sielu” (Aruf. 21:1). Siñabei hamuga ñein lan Arúeihani lánina Milu Irumu le lani Kristu ánhaña hamuga ua gürigia ubouagu lun hagumadirúniwa (Aruf. 20:4, 5). Maweiyasunbei ni aban lídangiñe katei le asusereda!
Luéigiñe amu oubaü, anhein hamuga ígira Heowá lun lagumuchúniwa hau lumutuniña ubouagugiñe, machourun wabéi hamuga luagu gabafu lan ani wuribabei hamuga lerederun liri. Ladaseiruba hamuga giñe Liricha lun larúeihani sun ubóu. Ladüga inebegua lan lúniwagua ani inebe ligía liri le sándubei lun, maweiyasunbei ígira lun lasuseredun katei le. Samina wamá luagu bérusu le: “Úati marichaü lidan” Bungiu, ligíati chouru wamuti lóunigirubaña lan Bungiu lubúeingu ha eseriwidubaña lun lau úaraguni keisi sétanu (2 Lur. 32:4; Agu. 18:25). Úarati le luma le tariñagubei Bíbülia: “Luagu liri Wabureme, mígirun lubadün” (1 Sam. 12:22). Le linarün katei, mágurun lubaña Heowá “lumutuniña, mígirun lubaña giñe lánigu hábugua” (Sal. 94:14).
Ruti dǘgüdaguaü woun wasubudiruni maweiyasunbaña lan lumutiña Bungiu agumucha ubouagugiñe. Ligíati, úaragua wamá lun Heowá súnwandan ani afiñe wamá luagu füramasei le ladügübei: “Úagili ni aban adügütu áruma to lunboun tagünrinchagunibu. Bámanichagüdübei sun le íchuguti bidurun. Anihán katei le níchugubei houn ha eseriwidubaña nun” (Isa. 54:17).
[Ariñahani lidan létüra wéinamuti lidan páhina 12]
Maweiyasunbei Bungiu ígira lun lagumuchun hau lumutuniña sunsuinagubei