Milaguru burí le lunbei lasuseredun yarafa madise
SAMINA humá: lun hamuga belumémeedün lan tidoun rumu to ñein lubéi hibugúa sánditiña, sódini aba híchugun fe luagu anihánba lan furumiñeti wéiyaasu ladügüni hisurusian luwuyeri íbuguni le. Ida luba hamuga hasandiragun hungua? Chóuruti wéiribei lan hamuga hidiheri. Gama lumoun, ma inarüni ámubei lan yebe hasandiragun hungua anhein subudi hubalin luagu hisurusian lan buídutimabei lidan wadagimanu le, ani buíduñahaali lan lidin lun lidan saragu san íbuguni le adüga láalibei libe le lunbei ladügüni huagu? Ladügüba hasubudiruni lira lun chouru lan hasandiragun hungua.
Ítara liña ubóu le kei aban sánditi le mégeibei aban óunwenbu íbuguni. Füramase haali Heowá tidan Bíbülia to Lererun luagu ladügübei lan Ubóu ábanme paraísu (2 Féduru 3:13). Gama lumoun lun lasuseredun lira, mégeiwati lun hagumuchaguagüdüniwa wuribatiña sunsuinagubei (Sálumu 37:9-11; Ariñawagúni 2:21, 22). Anhein magumuchúniwa lau óunwenbu burí turóbuli le gádanbaliña gürigia, siñabei ladügǘniwa Ubóu ábanme paraísu. Chóuruti mégeiwa lan aban milaguru! (Arufudúni 21:4, 5.)
Chouru hamuti gefentiña luagu Heowá luagu málühali lan óunwenbu burí asansiruni le adügǘwa ubouagu. Ka uagu? Ladüga arufuda lumuti milaguru burí le adüga láalibei Bungiu luagu gabafu lan lun lagunfuliruni le füramase lubéi. Konpararü wamá sísirügü lídangiñe milaguru le uágubei tabahüdagua Bíbülia luma burí füramasei le adüga láalibei Bungiu lubá ámuñegü.
Agunbiraha wamutün lun hasubudiruni füramasei burí le tídanbei Bíbülia buidu. Eibume lederebugudun hafiñe, laganwounduba giñe hemenigi lun hibihin buiti lídangiñe milaguru burí le yarafaalibei lun ladügüni Heowá.
[Rekuáduru tuma iyawaü burí to lídanboun páhina 7]
MILAGURU:
HÓUGUDATI HESUSU SARAGU MILU GÜRIGIA TÁURÜGÜ FIÚ FEIN HAMA FIÚ ÚDURAÜ. (MATÉU 14:13-21; MÁRÜKOSU 8:1-9; HUAN 6:1-14)
FÜRAMASEI:
“Ru laali múa lin; biní láadiwa Wabungiute!” (SÁLUMU 67:6)
BUITI LE LANÜGÜBEI WOUN:
ÚAAÑAME GÜRIGIA AWANDUTIÑA ILAMAÜ.
MILAGURU:
ADÜGATI HESUSU LUNYA HARIHIN MARIHINTIÑA. (MATÉU 9:27-31; MÁRÜKOSU 8:22-26)
FÜRAMASEI:
‘Ábame harihin ha marihinbaña.’ (ISAÍASI 35:5)
BUITI LE LANÜGÜBEI WOUN:
HARIHUBA SUN HA MARIHINBAÑA.
MILAGURU:
AREIDAGUAGÜDATI HESUSU DANIMATIÑA. (MATÉU 11:5, 6; HUAN 5:3-9)
FÜRAMASEI:
“Hachubahaba ha méibugunbaña kei usari.” (ISAÍASI 35:6)
BUITI LE LANÜGÜBEI WOUN:
LAREIDAGUAGÜDǗWABA SUN DANIMAÜ.
MILAGURU:
AREIDAGUAGÜDATI HESUSU SUN LUWUYERI SANDI. (MÁRÜKOSU 1:32-34; LÚKASI 4:40)
FÜRAMASEI:
“Mariñagunbei ni aban lílana fulasu: ‘Sándiñadina’.” (ISAÍASI 33:24)
BUITI LE LANÜGÜBEI WOUN:
ÚAALIME SANDI ANI BUÍDUBEI WÁTUADI.
MILAGURU:
GABAFUTI MEHA HESUSU LUAGU KATEI KÉIBURI HUYA, GARABALI, O KATEI LÍBEINA LIRA. (MATÉU 8:23-27; LÚKASI 8:22-25)
FÜRAMASEI:
“Hábunaguba gürigia haban ábame haganóun tidan, hábunaguba beibei ábame héiginu tin. Mawadigimaridunbaña luagu ni kata.” (ISAÍASI 65:21, 23)
“Mañawurihan láadibume anufudei.” (ISAÍASI 54:14)
BUITI LE LANÜGÜBEI WOUN:
ÚAALIME HÁRABAGANALI, HERIGINI, O KATEI LÍBEINA LIRA.
MILAGURU:
ÁGUYUGUAGÜDATI HESUSU HILAAÑA. (MATÉU 9:18-26; LÚKASI 7:11-17)
FÜRAMASEI:
“Sun hilaguaaña [...] ábame háfuridunga lídangiñe hamúaha.” (HUAN 5:28, 29)
“Derege lumutiña barana sun ha óunwegubaña lidan; derege laña giñe óunweni luma habara hilaaña sun hilaguaaña ha lábugiñebaña lubafu.” (ARUFUDÚNI 20:13)
BUITI LE LANÜGÜBEI WOUN:
HÁGUYUGUAGÜDÜWABA WADUHEÑU HA HILAGUAAÑABAÑA.