Ka san uagu anihagua lubéi liwiye igaburi?

ARUFUDA lumuti bérusu le buidu ida liña lan harúeihan güriga. Barühali harúeihan gürigia saragu asufuriruni houn amu. Lidan sun dan le sügühalibei, álugaaña gürigia lau aban lubuidun saminaü lun hawinwandun lidan richaguaü, gama lumoun, ariha hamuti manügün lan háfaagun resultóu buiti, ladüga güridí luma ladüga múaraguni. Ka uagu lasusereda katei le? Ka uagu anihagua lubéi liwiye igaburi? Ladügatima ǘrüwa katei wuribati.

1. Lubafu figóu.

Furanguti tarufuduni Bíbülia luagu sun lan wagía “lábugiñeña[diwa] lubafu figóu” (Rómana 3:9). Gayarati konpararü wamani figóu luma aban sandi le galagante wabéi ani máraninati. Lúmagiñe saragu milu irumu, gabafuti figóu hawagu gürigia kamá hamuga aban urúei, ani súnwandan lábugiñeñadiwa lan ‘lilurudun’. Kei galagante wabalin figóu adügati lun híchuguni saragu gürigia le súdinitimabei houn lidan furumiñeti lúgaaru o háfaagun lidan habagari lun habihin umegeguni o ubafu meberesenga anhein mosu lubéi hagidaruni hawéi amu (Rómana 5:21; 7:17, 20, 23, 25).

2. Lubafu ubóu wuribati le ídanbei wawinwanda.

Buin liña Ubóu le ídanbei wawinwanda lau güridí ani hóunguarügüñein gürigia habusenra katei buiti. Ladüga wawinwandun lidan aban ubóu ítarati, añahein gürigia hénrenguti houn amu lan ligaburi hóuserun hawéi ha híbiri. Ligíati, ladüga hanarime lan güridí hamá, wéiriti hayumahan gabafu hamá ani wéiriti giñe habusenrun habihin lóugiñe seinsu luma umegeguni le hemegeirubei. Le hírubei, meberesentiña lan hóuserun lau aban igaburi wíyeti lun habihini le habusenrubei. Lubaragiñe hamuga hárügüdagun houngua luéi katei burí le ínchahabaliña óusera ítara, aba desidírü hamá hafalaruniña “hiibe-agei lidan hariban” (Áfuriduni 23:2).

3. Lubafu Satanási, le Mafia.

Satanási, aban ánheli mabuchahati, ligía “eyeehabalin sun ubóu” (Arufudúni 12:9). Hínsiñeti lun Mafia ladügün lau sumadi lun hadügüni gürigia le labusenrunbei. Besafu dan yusu lumuti Mafia hayumahan gürigia lun buidu lan habagari sin turóbuli le lánina seinsu, ani ínchaha lumutiña gürigia íweruha.

Mini lan san lira ítara waña lan kei aban muñega lúhaburugu Satanási ani gayara lan ladügüni le labusenrun wau le oura labusenrun? Wadarirubei óunabagülei lidan le aban arütíkulu.