Barüti láguyugun Hesusu ibagari
MAMA ábanrügü binadu sügǘ le málati láguyugun Hesusu. Afuranguagüda lumuti apostolu Pábulu ítara: “Sarati Kristu lídangiñe óunweni; ligía furumiñetibei ásaaruti lídangiñe óunweni. Ítara kei lídangiñe lan aban wügüri liabin óunweni ubouagun, ítara giñe, lídangiñe lan aban wügüri liabin hásaarun hilaaña. Ítara kei hóunwegun súngubei ladüga lídangiñe lan Adán hayabin, ítara luba giñe gabagariya hamá súngubei lárigiñe óunweni ladüga lánigu hamá Kristu” (1 Korintuna 15:20-22).
Águyuguati Hesusu lídangiñe óunweni 16 lidan nisán, irumu 33. Ligía meha luéyuribei hadagaragüdüni huríu furumiñeti halubahan ligibugiñe Heowá Bungiu tidan ténpulu to Herusalénboun. Lau lariñagun luagu Hesusu “furumiñetibei”, ígirati Pábulu furangu luagu háguyuguba lan amu gürigia.
Lererun apostolu Pábulu le asigirubei afuranguagüda lumuti le lunbei ladügüni láguyugun Hesusu: “Ítara kei lídangiñe lan aban wügüri liabin óunweni ubouagun, ítara giñe, lídangiñe lan aban wügüri liabin hásaarun hilaaña”. Ladüga figóu le galagante wabéi lúmagiñe Adán, sun wagía hilatiwa. Gama lumoun, lárigiñe líchuguni Hesusu libagari sin figóu lebegime wasalbarun, adügati lun mámaadiwa lan buga lidamun figóu luma óunweni ani lun gayara lan giñe wáguyugun lídangiñe óunweni. Lidan Rómana 6:23 ariñagati Pábulu lidan murusun dimurei: “Lugundun óunweni lafayeihabei figóu; ánheinti edewehani le líchugubei Bungiu woun, ibagari le magumuchaditi lidan Wabureme Hesukrístu”.
Hesusu guánarügü afuranguagüdübalin lisudinin lounwen luma láguyugun woun. Dan le layanuhan luougua, ariñagati mosu lan buga láguyuguagüdüniwa hádangiñe hilaaña “lun sun lan le afiñeruti [l]uagu, meferidirun hamaamuga, gabagarirügü hamaamuga aban ibagari le magumuchaditi. [...] Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:14-16).
Samina humá: ibagari magumuchaditi sin igarigu ni asufuriruni! (Arufudúni 21:3, 4.) Ma lubuidun emenigini! Ariñagati aban aturiahati: “Haritaguagüda lumutiwa umúahaü luagu lichatin ibagari, ánheinti águyuguni haritaguagüda lumutiwa luagu lichatin óunweni”. Siñati lasigenerúniwa luagu barǘ lan láguyugun Hesusu ibagari.