TÍTULU LE LUÁGUBEI TIDÁÜ: GAYARATI GASUUNI LAN WABAGARI
Gayarati san gasuuni lan wabagari?
“Ǘrüwa wein diisi irumu ligía wabagaridubei; ha héretimabaña chülütiña darí gádürü-wein; gama lumoun igarigu luma wadagimanu líchugubei limigifen ibagari.” (Sálumu 90:10)
WÉIRITI inarüni lan dimurei burí le! Ibagari lidan ubóu le buin liña lau “igarigu luma wadagimanu”. Ligía hálügüdagunbei gürigia houngua anhein gayara lubéi gasuuni lan habagari.
Ayanuha wamá tuagu Maria. Súnwandan meha aban tan würi benefatu; anhein guentó, 84 irumu tau, siñamemeli táfuridun túbiñegiñe. Íbini buídugili lan tichügü, méreli tugubu. Ida luba gayara lan gasuuni lan tibagari ítara?
Susereti san ligiaméme hun? Háfuga álügüdaguañahadün hungua anhein gasuuni lubéi hibagari. Háfuga ligiaméme huadigimaribei sagü weyu ani buchati huagu adügei, ani genegeti úati lan arihiti áfaaguni le hadügübei. Íbini hamuga buidu lan lidin hun, háfuga nidiheritün luagu le lunbei lasuseredun ámuñegü; o anihein lan dan híru humá o hasandiragun hungua hábuguarügüñadün lan, o háfuga anihein saragu magundani lidan hufamilian. Gayarati féridihadün lan somu hiduhe lidan óunweni. Ligía meha asuseredubei lun aban wügüri gíriti André. Sódini aba lasandirun lúguchi ani aba lounwen. Wéiriti meha lubuidun lanaagun André lungua luma lúguchi, ígirati óunweni le aban lanarime igarigu luagu André, darí lun lariñagun úabei lan gayarati lárügüdüni lilugaarun lúguchi sunsuinagubei.
Ka lan yebe luwuyeri turóbuli úmati wadunragua lidan wabagari, busentiwa wasubudiruni anhein gayara lubéi gasuuni lan wabagari. Darí wamuti óunabagülei lidan libagari aban wügüri le awinwandubei ubouagu kéiburi bián-milu irumu guentó: Hesukrístu. Íbini gibe lan lénrengunga úmati lagagibudagua, wínwanti aban ibagari buiti ani gasuuniti. Ani gayarati giñe wadügüni ligiaméme anhein wáyeiha lani hénpulu.