Chagaguaü lánina liñawan dan: arufudati san furunde lan Bungiu?

LE HARIÑAGUBEI GÜRIGIA: “Furundeti Bungiu, ligía adügübei lun liabin liñawan dan ladüga ligía agumadihabei ubouagu”.

LE TARIÑAGUBEI BÍBÜLIA: “Lábugiñeñanu [...] lubafu Mafia sun ha lánigubaña ubóu” (1 Huan 5:19). Aban san libidiounigan aau le? Samina huméi le: anhein gabafu lubéi Satanási luagu ubóu, gayarati línchahaniña gürigia lun hawouguounrügü lan hasaminara, lun igaadua hamá ani lun marihin hamani katei furangu kei ligía. Ma ídehati le lun larihín furangu ka lan uagu luribanbei hayusuruni gürigia sun le geyegubei wau? Gíbetiña sásaamu eweridihatiña luagu gayara lan ladügün katei le lun lasuseredun chagaguaü lánina liñawan dan, lun laganwoundun o lun ménrenguntima lan ladügǘn dañu lun ubóu.

Kati uagu lígira Bungiu lun Mafia lan agumadiha ubouagu? Lun wóunabuni álügüdahani le, mosu wagiribudun lidoun lagumeseha sun katei. Aba meha hebedaagun furumiñetiña wagübürigu lun Bungiu —lidan amu dimurei, aba hamahadun lun ligía lan harúeite— ani lúmagiñe dan ligía, ligiaméme hadügübei hibe-agei gürigia. Lau hanúadahan ítara, sun ubóu lúhaburuguñein Satanási, le lágani Bungiu. Ligía lagúarunbei Hesusu lun Satanási, “le agumadihabei lidan ubóu le” (Huan 14:30). Gama lumoun, magumadihanbei lun súnwandan.

Bereseti Heowáa lau sun asufuriruni le lanügübei Satanási houn gürigia. Kei hénpulu, ariñaga tumuti Bíbülia ida liña lan meha lasandiragun Heowá lungua dan le larihini sun lénrengunga le hasufurirubei ísüraelina: “Ariha naali hasufurirun numutuniña ha Ehiptubaña. Aganba naali hagúarahan amuriaha ídemuei hawéi ábutigu ha amudiragubaliña, ani subudi numuti hasufurirun buidu buidu” (Áfuriduni 3:7). Ligíati, lidan lueirin lugudemehabu, desidírühali lagumuchun lau luriban lagumadihan Satanási, ani ladügübei yarafa madise. Ru laali giñe arúeihani lun Hesukrístu, le Liráü, lun ligía lan urúei lun sun dan.

KA MINI LUBÉI LE WOUN: Móunigirun lumutiña Satanási gürigia luéi efekütu le lanügübei chagaguaü lánina liñawan dan, anati Hesusu lóunigirubaña. Dan le meha ya lubéi ubouagu, góunigi lumutiña meha lánigu disipulu lidan aban lanarime liñawan dan. Ariñagatu Bíbülia: “Aba ladeinhan lun garabali, aba lariñagun lun lagunu: ‘Maniba! Deregüdaguabá! Aba lagalumadun garabali, aba darangila lan sun katei”. Aba taweiridun hanigi disipulugu, aba hariñagun hóuniwagua: “Katei funa san le, íbini lubéi garabali luma barana adüga hamuti le lubeibei?” (Márükosu 4:37-41). Ruti katei le afiñeni woun luagu lidan lanme larúeihan Hesusu lóunigirubaña lan sun gürigia ha gaganbadibaña (Danieli 7:13, 14).