TÍTULU LE LUÁGUBEI TIDÁÜ: IYEENI BURÍ LE ADISEDAGÜDÜBALIWA LUÉI BUNGIU
Iyeeni luagu míriti lan Bungiu
LE HARIÑAGUBEI GÜRIGIA
“Machülügidiwa lidoun ni aban luwuyeri aransehani luagu anhein gayara lubéi wariñagun giri lan Bungiu. Ani lun hamuga giri lan, ibidiñebei hamuga woun ka lan liri.” (Máisturu David Cunningham, tidan liliburun Theological Studies.)
LE TARUFUDAHABEI BÍBÜLIA
Ariñagati Bungiu: “Heowá Au. Ligía níribei” (Isaías 42:8, Reina Valera Actualizada). Aban iri ebüréu Heowá ani mini lan “Ladügüba Lun Lasuseredun”.
Busenti Heowá lun wayusuruni liri. Ariñagatu Bíbülia: “Ru humá seremei, agúaha humeime [liri, TNM] Aburemei, habahüdagua houn néchanigu luagu burí katei le ladügübei. Haritaguagüda humaña luagu lóugiñeñein lan sun katei” (Isaíasi 12:4).
Yusu lumuti meha Hesusu liri Bungiu. Lidan aban furíei ariñagati Hesusu lun Heowá: “Inebewalá biri” (Matéu 6:9). Subudigüda lumuti meha Hesusu liri Bungiu houn lani disipulugu. Ka uagu ladügei? Aba lasigirun ariñaga: “Lun ñein lan ínsiñeni le buágubei nun hadan, lun giñe ñein nan hadan” (Huan 17:26).
KA UAGU LUNTI LUBÉI HASUBUDIRUNI
Abürühati Walter Lowrie, aban aturiahati luagu relihión: “Gürigia le unbei ibidiñe lan liri Bungiu ibidiñerügü liña Bungiu lun kei gürigia [...] ani siñati línsiñedun Bungiu lun anhein subudirügü lubalin keisi aban erei”.
Anihein aban wügüri gíriti Victor sagü meha dimaasu lidin ligilisirugu, gama lumoun ibidiñeti meha ni kata lun luagu Bungiu. Aba lariñagun: “Dan le nasubudirunbalin Heowá lan líribei Bungiu, ítara liña kamá hamuga ñǘbuinrügüti aban gürigia ariñaga nun ‘anihán Bungiu, Heowá líribei’. Chülüdüga meha oura lun nasubudiruni Bungiu le uáguñahabei naganba. Aba nagumeserun arihei Bungiu kei aban gürigia inarüniti ani aba nadügün umadaguaü luma lúmagiñe dan ligía”.
Laramudun liri Bungiu o lásügüiragüdüniwa luagu amu ítara liña kamá hamuga lagidarúña tídangiñe Bíbülia
Yarafati Heowá houn ha “íchubaña inebesei lun [liri]”, ani füramaseti: “Ítara kei gudemehabu lan aban úguchili lun liráü le eseriwidubei lun, ítara luba gudemehabu nan houn” (Malakíasi 3:16, 17). Biní lumutiña giñe Bungiu sun ha agúarubaña lun lau liri. Ariñagatu Bíbülia: “Sun ha agúaruti liri Wabureme, hasalbaruba” (Rómana 10:13).