Ka uagu lígira Bungiu lun hadügün gabafutiña dañu houn ha débilibaña?

Tidan Bíbülia daritiwa abahüdaguni hawaguti gürigia gabafutiña ha asufuriragüdübaliña ha débilibaña. Kéiburi urúei Aabü —le agumadihabei Ísüraeli lidan sígulu X lubaragiñe wadaani— busenti meha lerederun lau aban ichari tábunaguagüle beibei le lani Nawotu hama lisaanigu.a Aba tadügün urúei Hesawéli lun lafarún Nawotu hilagubei lun tagidaruni hachari hawéi, ani madügünti urúei ni kata lun lerederunu (1 Urúeigu 21:1-16; 2 Urúeigu 9:26). Ka uagu lígira Bungiu lun lasuseredun katei líbeina le?

Aban resun súdiniti ladüga meyeehan lan Bungiu (Titu 1:2). Gama lumoun, ida liña úara lan katei le lau layusurúniwa ubafu wuriba? Lidan lagumesehan sun katei ubouagu, ariñagati meha Bungiu houn gürigia anhein lan hebedaagun lun, hóunweguba lan; ani ligía asuseredubei. Lúmagiñebei ebedaaguni lidan fuluri-agei Edén, siñagili hesefurun gürigia luéi óunweni. Ani le furumiñeti óunweni le asuseredubei ubouagu susereti ladüga luriban layusurún ubafu. Aba láfaruni Kaín Aweli, le lamulen (Agumesehani 2:16, 17; 4:8).

Ariñagatu Bíbülia lúmagiñe lan dan ligía ladügüña lan gürigia “damichi lun gürigia líledi” (Apurichihati 8:9). Kei hénpulu, wéridi lumutiña Heowá ísüraelina, ha lumutuniña, luagu añaheinbaña lan urúeigu ha magudemehabutiña lidan hagumadihan, ani hadügüba lan lun hagúarun lun áluaha ídemuei (1 Samueli 8:11-18). Íbini urúei Salomón ruti meha lidere dan houn lílana ageiraü (1 Urúeigu 11:43; 12:3, 4). Ani añahein meha urúeigu wuribatimatiña, kéiburi Aabü. Guentó samina huméi le: lun hamuga meha mígirun lan Bungiu lun hayusuruni urúeigu ha habafu lun hadügün dañu houn amu, ma iyeeniñein hamuga lererun?

Luagu amu oubaü, ariñagati Satanási luagu seriwi hamá gürigia lun Bungiu luágurügü le líchugubei houn (Hobu 1:9, 10; 2:4). Lun hamuga lóunigiruniña Bungiu lubúeingu luéi hasufuriragüdüniña amu, ma líchuguñein hamuga resun lun Satanási? Ani lun hamuga lóunigiruniña sun gürigia, ladügüña hamuga lun hafiñerun aban iyeeni wéiritimati: luagu gayara lan lagumadiragun wügüri lungua sin lídehan Bungiu. Ani mama ligía tariñagubei Bíbülia, ariñagatu siñati lan lagumadiragun wügüri lungua (Heremíasi 10:23, Reina-Valera Actualizada). Megei wamuti liabin Larúeihan Bungiu; ítararügübei lagumuchun houserún gürigia wuriba.

Mini lan san le chagu liña lan larüna Bungiu? Uá; ladügüña bián katei guentó. Furumiñe, subudigüda lumutiña ha óuserubaña lau furundei. Kei hénpulu, ayanuhatu Lererun furangu luagu iyeeni le meha tariñagubei Hesawéli lun tagumuchun lau Nawotu. Ariñagatu giñe Bíbülia lanagangiñe lan sun burí wuribani le anihein lan aban gumadimati gabafuti le áluahabei laramuduni káteiñein lan (Huan 14:30; 2 Korintuna 11:14). Ka uagu wayanuha? Luagu Mafia. Lau lariñaguni Bungiu kátaña lan ayusurubalin habafu lun hadügün dañu houn amu, íderagua lumutiwa lun wadisedun luéi wuribani. Ani ítara lóunigiruñadiwa lun wawinwandun lun súnwandan ámuñegü.

Lidan libiaman lúgaaru, chóurugüda lumuti Bungiu woun lagumuchuba lan lau sun le asufuriragüdübaliña gürigia. Ligaburi larufuduni, laguseragüdüni luma labeichuni Aabü tuma Hesawéli —hama amu gürigia ha ítarabaña kei hagía— adügati lun wafiñerun luagu le füramase lubéi: laguseragüdüniña sun wuribatiña (Sálumu 52:1-5). Chóurugüda lumuti houn gürigia ha hínsiñehabubaña lun luagu málühali lan agidarei lani wuribani efekütu.b Lawinwanduba Nawotu hama lisaanigu lun harihini Ubóu danme le paraísuhali ani danme le úaali marichaü (Sálumu 37:34).