TÍTULU LE LUÁGUBEI TIDÁÜ
Kátaña san gefentiña luagu Heowá?
“Sügühali saragu irumu guenlé lúmagiñe nasubudiruni Mike. Gefenti luagu Heowá ligía ani súnwandan nálügüdagun saragu katei nungua libügürü lani relihión. Ka Heowabei? Ka uagu mefeduhan habalin gefentiña luagu Heowá fedu burí le hefeduhabei hiibe-agei gürigia? Ka funa san relihión le ídounbei ládaragua Mike lungua?” (Becky, Kalifornia, Meriga)
“Dan le hagumeserunbei nubesinanigu aturiahoun Bíbülia hama gefentiña luagu Heowá, aba nálügüdagun nungua: ‘Ka funa san mini lubéi iri gefentiña luagu Heowá? Ma lámuñe iri lun aban relihión!’” (Senon, Ontario, Kanadá)
“Saminatina yebe meha, au tuma nani weiriou, hayabiña lan gefentiña luagu Heowá áluga hachansihan luagu luriban wasandiragun woungua ladüga mabasihan wamá ligilisirugun. Ani saminatiwa meha giñe anhein lan madari wamagili lubéi meha le wáluahabei lidan burí relihión le kamanitimabei, gúbudigiame lidan aban relihión ámuti kei hani gefentiña luagu Heowá.” (Kent, Washington, Meriga)
“Le linarün katei, ibidiñegubeiti meha nun kátaña lan ni ka lan hafiñerubei.” (Cecilie, Esbjerg, Dinamárüka)
Másiñati ariha humaaña lan apurichiha tidan burí muna o ǘmada, ederegeha agumeiraguagüdüni tídangiñetu Bíbülia o álügüdaña gürigia anhein busén habéi haturiahanu Bíbülia mafayeihanga. Másiñati giñe lúmagiñe lan aban hádangiñe heresibiroun garüdia to húhaburuguboun guentó. Íbini ítara, gayaraati álügüdagua humá hungua kátañatimañanu lan gefentiña luagu Heowá. Háfuga genegegua lan hisaminan luma le hasaminarubei gürigia ha iridúbaña iñu.
Anhein anihein lubéi somu katei habusenrun hasubudirun hawagu gefentiña luagu Heowá, ka gayaraabei hadügüni? Halíaba hakutiha libügürü hafiñen, ida liña lan lamainirúniwa hawadigimari tuma burí muna to ñein lubéi hadamuridagua o ka lan uagu hadaünha luagu hubenari o hararamaguagüdaün ǘmada?
“Aliihatina saragu katei hawagu gefentiña luagu Heowá lidan Internet,” tiña Cecilie, to iridúboun iñu. “Gíbeti meha katei naganbun hawagu le adügübei lun nasaminarun wuriba hawagu.” Lárigiñehali tayanuhan Cecilie tungua hama gefentiña luagu Heowá tasubudirei kátima lan inarünibei.
Anhein busén hubéi hasubudiruni lóunabagüle álügüdahani le hadügübei húniwagua habügürü gefentiña luagu Heowá, álügüda humaña! Hagía adügübarun garüdia to ani hagíaba ariñagei liricha katei hun libügürü kátaña lan (Ariñawagúni 14:15). Agurabatiwa líderagunün arütíkulu burí le asigirubei lun hasubudiruni kátaña lan, ka lan hafiñerubei luma ka lan hadügübei.