Aban álügüdahani le adiheridagüdübaliña gürigia

ÁMUÑEGUEINARÜGÜTI hasaminan gürigia luagu ibagari luma óunweni. Añahein asaminarutiña hasigiruba lan awinwanda lidan amu fulasu lárigiñe hounwen. Añahein giñe asaminarutiña nasiruayabaña lan lunya hawinwandun. Ani añahein amu ariñagutiña lidan lan óunweni lagumucha sun katei.

Gayarati amu lan giñe hisaminan luagun katei le según ligaburi hagüriarún o según fulasu le ñein lubéi haweirida. Ligíati, kei le anihein lubéi ámuñegueinarügü afiñeni luagu le asuseredubei lárigiñe óunweni, gayarati san ladarirún óunabagülei lun álügüdahani súdiniti le?

Luagu saragu sígulu, arufudahaaña lábutigu relihión luagu móunwedadi tan uani. Libe-agei relihión, dandu le Kristiánu, Indú, Huríu luma Islam, arufudahatiña lau ichouruni luagu anuhein lan aban uani to erederuboun wínwanñu dan le hounwen gürigia ani aba lan tasigirun awinwanda lidan fulasu le ñein habéi sífirigu. Ánhañati ha áhuduragubaña lun Buda, afiñetiña lárigiñe lan hounwen gürigia nasiruaya hagía saragu wéiyaasu, aba lan lachülürün dan lun hesefurun luéi asufuriruni ani aba lan hagundaarun sunsuinagubei, wátiña lun katei ligía nirvana.

Adügaali sun arufudahani burí le lun hafiñerun hibe-agei gürigia dan le lan hounwen hásügürarügüña lan lidoun amu ubóu. Ligía hasaminarunbei saragu aban lan fánreinti súdiniti óunweni lidan ibagari luma lidan lisuuni Bungiu. Gama lumoun, ka san tariñagubei Bíbülia? Agunbiraha wamutün lun haliihani leweñegua arütíkulu. Háfuga taweiridun hanigi lau óunabagülei.