“Biniwatibu [...] luagu lubuidun baritagun”

ANIHÁN dimurei burí le lariñagubei Dawidi, le binadu lurúeite Ísüraeli tun aban würi gíritu Awigaili. Ka uagu ladügei? Ka wafurendeirubei lídangiñe tani hénpulu?

Dan le léibaahanbalin urúei Saulu Dawidi ligía lasubudirunu Awigaili. Tuguya meha lániboun Nawali weiriou, aban wügüri rísiti lídangiñeti fulasu gawübüriti le luágunbei suru lani Hudá ani gíbetiña meha lilügüniña mudún. Góunigi lumutiña meha Dawidi hama luwügüriña lilügüniña Nawali mudún hau sun ha óunigirubaliña. Ábati lóunahan Dawidi fiú wügüriña lun hamuriahan furumiñeguarügü katei le gayarati líchuguni Nawali houn lun heigin (1 Sam. 25:8, 15, 16). Garichatiña meha lun hamuriahan luma, ladüga góunigi hamaali meha lumegen.

Gama lumoun, óuserati Nawali úaragua luma le mini lubéi liri, “ibidiougua tau” mini lubéi liri. Aba lóunabuni Nawali Dawidi lau anabahani. Ligía aba lubéi laranserun Dawidi lun lafayeiragüdüni luagu luriban lóuseruni. Sérubei meha lafayeihan Nawali hau sun liduheñu luagu le ladügübei (1 Sam. 25:2-13, 21, 22).

Dan le tíchugun Awigaili fe luagu luriban resultóu le lunbei lanügüni ligaburi lóunabun Dawidi, aba tarufudun ganigi ani aba tadügün aban katei. Aba tamuriahan luma Dawidi lau inebesei lun lasaminarun buidu, lau taritaguagüdüni lumadagua luma Heowá lun. Barütu giñe bandi éigini lun tíchuguni lun luma houn luwügüriña. Aba líchugun Dawidi fe Heowá lan ayusurubarun lun tararamuni luéi ladügün aban katei le wéiriti luriban ligibugiñe Heowá. Aba lariñagun tun: “Biniwatibu giñe luagu lubuidun baritagun, lugundun rédeibaadina uguñe luéi náfarahan” (1 Sam. 25:18, 19, 23-35).

Ménrengunti wíchugun fe luagu moun lumuti lan wóuserun lau meteingiradi, kei meha lóuserun Nawali. Ani dan le warihin lasusereda lan aban katei wuribati, adüga waméi sun wayaraati lun waransehani katei. Ariñaga wamá lun Heowá kei lariñagun abürühati Sálumu: “Ruba lichú aau nun luma subudi” (Sal. 119:66).

Gayarati hasaminarun ha híbiri gürigia óusera wamá lau duari luma lau lichú aau. Ariñaga haméi yebe o mariñagun hamani, gayarati hariñagun kei Dawidi: “Biniwatibu [...] luagu lubuidun baritagun”.