Subuditi san hun?

Ka échuni hani huríu adügübei lun lasiadiruni Hesusu áfiñuruni?

ARIÑAGATI meha Lilurudun Moisesi anihein lan dan le ídanbei gayara lan ladügǘn áfiñuruni. Gama lumoun, lidan lidaani Hesusu héchuhaña meha saragu huríu áfiñura luagu libe-agei katei le hariñagubei. Ítara liña meha busén hamá hachoururagüdüni inarüni lan le hariñagubei. Siadi lumuti Hesusu échuni meseriwínti le bián wéiyaasu, lau lariñagun: “Ariñagarügü humá ‘anha’ o ‘uá’” (Mat. 5:33-37; 23:16-22).

Arufudahatu aban dimurei-agei to ayanuhaboun luagu Bungiu arihúa lan lidan fiú fánreinti lidan Talmud hechu hamá meha huríu áfiñura lun hachoururuni inarüni lan le hariñagubei. Afuranguagüda tumuti meha Talmud buidu buidu kaba lan áfiñuruni hagunfulira luma ka lan gayaraabei hadüraaguni.

Mámarügüñein meha Hesusu asiadirei échuni le. Kei hénpulu, ayanuhati aban abahüdaguti huríu gíriti Flavio Josefo luagu aban sétanu hani afiñetiña huríu, lau lariñagun: “Áfaaguatiña lun máfiñurun hamá ladüga hafiñerun wuribatima lan áfiñuruni luéi iyeeni. Ariñagatiña giñe siádiwaali lan aban gürigia le siñati lafiñerúniwa le lariñagubei madügünga ligía aban áfiñuruni lun Bungiu”. Ariñagatu giñe aban líburu huríu to subudiwaboun kei Eclesiástico o Sabiduría de Jesús Ben Sirá aban katei ítarati: “Aban hanarime lan luriban gürigia le áfiñurubei saragu” (23:11). Ligía aba lubéi lasiadiruni Hesusu échuni lánina larihín áfiñuruni kei ni kata. Anhein wariñaga inarüni súnwandan, memegeirúnbadiwa wáfiñurun lun lafiñerúniwa luagu le wariñagubei.