“Halíañein san Bungiu?”
“GABÜGÜRÜGUATI LADÜGǗN ÁLÜGÜDAHANI LE: HALÍAÑEIN SAN BUNGIU?” (Ariñaga lumuti tábuti ligilisi [papa Benediktu XVI] dimurei lira dan labisidahabalin fulasu gíriti Auschwitz le ñein lubéi hafosurúa gürigia lun hawadigimaridun ageiraü Polonia).
AGIA HUGUYA? ADÜGAÑAHA HUMAALI SAN ÁLÜGÜDAHANI LE DAN LE LASUSEREDUN SOMU LAMISELU? SUSEREELI SAN SOMU KATEI HUN LE SIÑATI HABULIEIDUNI ANI ADÜGA LIGÍA LUN HASAMINARUN MEBERESEN LAN BUNGIU HAU?
Másiñati sandigua humá hungua kei Sheila to awinwanduboun Meriga, lau sun meha weiri lan hafalaruni tiduheñu larufudahan hani relihión dan le aweirideina tubéi, ariñagatu: “Afiñetina luagu Bungiu lúmagiñe niñüraü ladüga subudi nani ligía lan Adügübaliwa, íbini ítara, masandiruntina meha yarafa lan nun. Lau sun meha subudi nani gayara lan larihinina, saminatina meha meteni lan nun. Íbini meha masaminarun nan iyereegu nan lun, masaminaruntina meha giñe berese lan nau”. Ka meha uagu tasaminara ítara? Afuranguagüdatu: “Súfuritiña niduheñu aban lamiselu lárigi aban, ani laganóun meha nun kamá míderagun lumutiwa Bungiu.
Ítara kei Sheila, másiñati giñe afiñe humá luagu Bungiu le suntigabafu, íbini ítara, gayaraati álügüdagua humá hungua anhein berese lubéi Bungiu hau. Adüga lumuti meha giñe Hobu, aban wügüri richaguati, álügüdahani le lúniwagua, lau sun meha afiñe lan luagu lubafu luma lichú lau Bungiu le Adügübaliwa (Hobu 2:3; 9:4). Lárigiñe lasufurirun Hobu saragu luma leferidiruni lemenigin, aba lálügüdüni Bungiu: “Ka uagu baramudagua nuéi? Ka uagu bóuserana kei aban ágani?” (Hobu 13:24).
Kati tarufudahabei Bíbülia? Bungiu san gadurunbei luagu sun le wasufurirubei? Anihein san somu katei le arufudubalin berese lan Bungiu hau sun gürigia luma lau kada aban wádangiñe? Gayaraati san wasubudiruni anhein teni lubéi woun, anhein gunfuranda lubaliwa, anhein gudemehabu lubéi woun o anhein íderagua lubaliwa dan le gaturobulin wamá?
Lidan burí arütíkulu le asigirubei, wakutihabei ida liña lan larufuduni Bungiu berese lan wau lau le tariñagubei Bíbülia luma lau le adüga láalibei (Rómana 1:20). Ítara, hasubudirubei Bungiu le Adügübaliwa ani éibume hasubudiruni chóurutima hubéi berese lan hau (1 Huan 2:3; 1 Féduru 5:7).