Álügüdahani burí le hadügübei aliihatiña

Layanuhaña san Sálumu 144:12-15 hawagu lumutuniña Heowá o hawagu gürigia terencha ha salufuribaña ha uágubaña layanuhóua lidan bérusu 11?

Gayaraati lásügürawagüdün abürüdǘni ebüréu lidan bián igaburi. Lau wasubudiruni katei le líderagubadiwa le lunbei warihini lun gufuranda wamani saminaü le lídanbei bérusu le:

1. Samina humá luagu le lariñagubei le líbiri bérusu le lídanbei Sálumu 144. Lau layusurún dimurei then (“ligíati”, TNM), le lídanbei bérusu 12 gunfurandawati ha lan richaguabaña agundaarubaña lau burí katei buíduburiti le iridúbei lidan bérusu 12 darí 14, ha amuriahabaña luma Bungiu lidan bérusu 11 lun lesefuruniña hawéi ha wuribabaña. Dariwati giñe saminaü le lidan bérusu 15, le ñein lubéi lariñaga bián wéiyaasu “fuleseiwatiña”, ani layanuhaña hawagu hagiaméme gürigia ha gabungiutebalin Heowá.

2. Úarati saminaü le luma amu bérusu tídangiñeti Bíbülia le ayanuhabei luagu abiniruni le lunbei líchuguni Bungiu houn lubúeingu ha úaraguabaña. Arufuda lumuti Sálumu 144 afiñe lan meha Dawidi lárigiñe lanme lesefuruni Bungiu ageiraü Ísüraeli hawéi háganiñu, labinirubaña lau ugundani luma lubuidun dan (Fad. 26:9, 10; 2 Lur. 7:13; Sal. 128:1-6). Kei hénpulu, ariñawagúati lidan 2 Lúrudu 28:4: “Habinirúba giñe birahüñü luma sun balubahan hama bilügüniña bágasu, mudún hama sun híbiri bibiñanigu”. Lidan sun larúeihan Salomón, le lisaani Dawidi, buiti meha dan houn lílana néchani Ísüraeli ani wínwantiña meha lidan darangilaü sügǘ luéi lidan amu dan. Ani amu luéi lira, arufudati arúeihani ligía fiu katei luáguti ítara luba lan larúeihan Mesíasi ámuñegü (1 Uru. 4:20, 21; Sal. 72:1-20).

Ligíati, furangutimahali larufuduni le gufuranda wamaalibei luagu Sálumu 144 le hagurabubei lubúeingu Heowá luagu saragu dan: lagumuchaguagüdübaña lan Heowá wuribatiña ani lanügüba lan darangilaü luma lubuidun dan lun súnwandan houn ha richaguabaña (Sal. 37:10, 11).