Ida liña meha habahüdüni gürigia dan?
KA WADÜGÜBEI dan le busén wamá wasubudiruni ka lan oura? Másiñati aban lan warihin luagun wawachin le luágubei wáhabu o le luágubei touba muna. Dan le lálügüdüniwa somu gürigia ka lan oura, ida liña wóunabuni? Ámuñegueinarügüti ligaburi wariñaguni lun ka lan oura.
Samina wamá sügühali lan aban oura luma bián-wein seingü minutu lárigiñe amidi. Gayaraati hamuga wariñagun keinsi lun biama, aban bián-wein seingü rábounweyu o bián-wein seingü lárigiñe aban. Ánheinti lidan lubéi aban fulasu le ñein lubéi labahüdǘwa darí 24 oura wawinwanda, másiñati wariñaguba lan hamuga 13:45 rábounweyu.
Dan waliihanu Bíbülia, másiñati aban lan wálügüdagun woungua: “Ida liña meha san habahüdüni gürigia ha lánina dan ligía dan?”. Ítara kei wagía, adüga hamuti meha lidan ámuñegueinarügü igaburi. Lidan Abürüdǘni Ebüréu, ayanuhóuati luagu “binaafin”, “amidirugu” luma guñoun (Agu. 8:11; 19:27; 43:16; 1 Uru. 18:26). Ani anihein dan, tariñaguni Bíbülia kátima lan oura lasusereda ítaga katei.
Lidan tidaani Bíbülia, wéiriti meha hayusurúniwa óunigirutiña o awisahatiña. Gúñountima meha hemegeirúa. Saragu sígulu lubaragiñe lágurahoun Hesusu, fánreingua hamuti meha ísüraelina guñoun lidan ǘrüwa fánreinti le uágubei hariñaga “lidaani óunigiruni” (Sal. 63:6, TNM). Lidan Alidihatiña 7:19, ayanuhóuati luagu “lidaani óunigiruni le lánina amidi áriebu”. Lidoun meha lidaani Hesusu, gumeseeña meha huríu abahüdei dan ítara kei hadügüni güriegu hama rómana, aba meha hafanreinraguni guñoun lidan gádürü lidaani óunigiruni.
Ayanuhóuati saragu luagu lidaani burí óunigiruni le lidan Ewanhéliu. Kéiburi, lidan meha lidaani óunigiruni le lánina binaafin léibuga Hesusu ligibuagu duna lun layarafadun tun ugunei ñein habéi lani disipulugu (Mat. 14:25, TNM). Ariñagati Hesusu lidan aban abahüdaguni: “Anhein lan hamuga lasubudira tabureme aban muna kaba lan oura liabin híweruti áriebu, lerederuña hamuga marumugunga; mígirunti hamuga lun lebelurúniwa íweruha lúbiñe” (Mat. 24:43).
Ayanuhati Hesusu luagu gádürügubei lidaani óunigiruni dan le lariñagunbei houn lani disipulugu: “Agagudúañu humá lubeiti, ladüga ibidiñeti hun kaba lan oura nagiribuda, anhein gúñounba lubéi lumoun áriebuba lan, o lubá lan larugan o binaafin lan” (Mar. 13:35). Le furumiñeti lidaani óunigiruni, le lánina guñoun, gumeseti meha lúmagiñe lálüdün Weyu darí kéiburi nefu guñoun. Le libiaman, le lánina áriebu, gumeseti meha lúmagiñe kéiburi nefu guñoun darí duusu áriebu. Le lǘrüwan, le lubaabei larugan, gumeseti meha lúmagiñe duusu áriebu darí kéiburi ladaürün ǘrüwa áriebu. Másiñati lidan lan lidaani óunigiruni le layuguruhan aban gayu guñoun le lárügüdünbei Hesusu (Mar. 14:72). Ani le ligadürün lidaani óunigiruni, le lánina binaafin, gumeseti meha kéiburi ladaürün ǘrüwa áriebu darí láfuachun Weyu.
Kei aubei warihei, íbini mawachin hamá meha gürigia ha lánina tidaani Bíbülia kei le wámabei guentó, subudi hamuti meha ida luba lan habahüdüni dan.