Kaba buiti hibiha anhein hasubudira Bungiu?

Darí guentó, akutihaadiwa fiu katei le íderagubaliwa asubudirei Bungiu. Arihaadiwa arufudaha tan Bíbülia Heowá lan líribei ani ínsiñeni lan igaburi le súdinitimabei luagu. Akutihaadiwa giñe luagu le adüga láalibei luma le lunbei ladügüni ámuñegü hawagu gürigia. Keiti gíbegili lan le lunti wasubudiruni luagu Bungiu, másiñati álügüdagua humá hungua anhein hu lubéi lun hadügüni.

Füramaseti Heowá hun anhein lan háluaha, lígiruba lan lun hadariruni (1 Krónikasi 28:9). Ánhadün áfaagua lun hadügüni, hibihuba aban lubuidun afayeiruahaü: aban umadaguaü buiti luma (Sálumu 25:14). Kaba buiti hibiha lídangiñe umadaguaü le?

Hadariruba ugundani inarüniti. Ariñagatu Bíbülia Heowá lan “Bungiu le gúndaabei” (1 Timotéu 1:11, TNM). Anhaün ayarafada lun Bungiu, áfaagua huguyame lun hafalaruni lani hénpulu, gúndaabadün le tímatimaati ani lanügüba lira buiti hun dandu huougua, kei lidan hisaminan luma ligaburi hasandiragun hungua (Sálumu 33:12). Ani lídehaba giñe lira lun hadisedun luéi ibagari le anügüti damichi hun, lun buidu lan humene, buidu ligíame hanaagun hungua hama amu. Chóuruti hasaminarubei lan lememe lasaminarubei abürühati Sálumu le ariñagubei: “Nayarafahóuba lun Bungiu, ladüga anihán lubuidun-ágeibei katei nun” (Sálumu 73:28).

Lóunigirubadün Bungiu. Füramaseti Heowá lun kada aban hádangiñe lumadagu: “Narufudubei üma le lunbei bafalaruni bun” (Sálumu 32:8). Mini lan lira, góunigi lani Heowá kada aban hádangiñe lubúeingu rulei le hemegeirubei houn (Sálumu 139:1, 2). Danme lederebugudun hamadagua luma Heowá híchuguba fe ñeinbei lan huma súnwandan danme hemegeiruni.

Wéiribei lubuidun hibagari ámuñegü. Lau sun ídeha lan Heowá lun hagundaarun guentó, füramaseti giñe aban lubuidun ibagari hun ámuñegü (Isaíasi 48:17, 18). Ariñagatu Lererun: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei” (Huan 17:3). Ítara liña emenigini le líchugubei Bungiu woun kei aban óunguru le deregüdati ani chóuruti le ágüdahabaliwa lidan burí dan hénrenguti le (Ebüréu 6:19).

Anihán fiu lídangiñe buiti le wibihubei dan le wasubudiruni Bungiu luma dan le wáfaagun lun gamadagua wamá luma. Anhein busén hubéi lanwoun ariñahani, agunbiraha wamutün lun hayanuhan luma aban gefenti luagu Heowá o lun hebelurun lidoun wani páhina lidan Internet www.jw.org/cab.