Fánreinti Lánina Álügüdahani
◼ Ka lunbei hóunigiruni agübürigu dan le háfuridun hasaanigu ha ñǘbürigiña apurichiha?
Buiti hanügüniña agübürigu hasaanigu hámagua lidoun apurichihani, ani íderagua hamaña aransera lun gayara lan hayanuhan luagu uganu buiti houn amu gürigia. Gama lumoun, mosu hetenirun houn luéi somu peliguru lidan fulasu le ñein lubéi wapurichiha, íbini lidan fulasu burí le genegeti chouru lan. Eibu lásügürün dan, yarafaguatimahali larihín ladügǘn dañu houn irahüñü lugundun wéiritimahali igaaduaü luma magíaguni ubouagu lidoun “weyu hénrenguti” le ídanbei wawinwanda (2 Tim. 3:1-5). Mosu hasubudiruni agübürigu ida luba lan hóunigiruniña hasaanigu hawéi gürigia ha gayarabei hadügün dañu houn. Ida luba hadügüni?
Adundeha tumutiwa Bíbülia lun duari wamá ani samina wagíame luagun le gayarabei lasuseredun (Ari. 22:3; Mat. 10:16). Mabusenruntiwa wíchugun lúrudu, gama lumoun, dan le háfuridun irahüñü apurichiha lunti háfuridun hama hagübürigu o luma somu íbiri le wéiriyaali. Ánhaña áfurida bián nibureintiña ha gayarati lafiñerúniwa hawagu apurichiha úara, buiti lun yarafañaha hamá hagübürigu houn o amu íbiri wéiriyaali. Gama lumoun, dan le haweinamudun irahüñü ani arufudatiña gayara lan lafiñerúniwa hawagu, gayarati desidírü hamani agübürigu anhein mégeigiña lubéi hóunigiruniña saragu (ariha huméi giñe Fánreinti lánina álügüdahani le tídanbei Wani Ministeriu to lánina diisi-hati irumu 1992).
Mosu giñe wóunigiragun woungua dan le woudin tidan karü o éibugeina. Anhein wadüga ítara, masuseredunbei danaguaü woun le gayarabei lanügün igarigu, hafayeirúniwa surusiagu, o hebelurun lidoun turóbuli hama lúrudugu lídantima ubóu le, le ñein habéi gürigia ganigitiña lágieru.
Buiti lun ‘halawahani nibureintiña liri Aburemei Heowá’ (Sal. 148:12, 13). Lau lubuidun burí dimurei luma lubuidun hóuserun lidan ministeriu wéirigüda hamutu hanigi gürigia ani rútiña uériguni lun Heowá. Agübürigu, adüga huméi sun hiyaraati lun híderaguniña hisaanigu asubudiragüdei uganu buiti, ani aranseñu hugíame lun hóunigiruniña luéi somu peliguru.