Igaburi súdinitimati le luágubei aban buiti máisturu
1. Aban gürigia le busenbei aban lan máisturu buiti, ka igaburi lunbei larufuduni?
1 Ka igaburi súdiniti le adügübei lun buidu lan aban máisturu le arufudahabei tídangiñe Bíbülia? Mosu san aban lan gürigia le aturiahabei tidan luban furendei, le lǘhali arufudaha o le garufudahadibei? Le linarün katei, ínsiñeni emegeirúbei, ligía igaburi le agunfulirubalin sun Lúrudu, luagu giñe igaburi le hasubudiruniwa ha afalarubalin Kristu, ligía igaburi le súdinitimabei ani buídutima ligía lídangiñe le larufudubei Heowá (Huan 13:35; Gal. 5:14; 1 Huan 4:8). Aban gürigia le busenbei aban lan máisturu buiti mosu larufudun ínsiñeni.
2. Ka uagu súdini lubéi hínsiñe hamá gürigia woun?
2 Ínsiñeni hawagu gürigia. Hínsiñehabuti meha Hesusu, Máisturu le Buídutimabei, ligía adügübei lun busén hamá gürigia haganbuni (Luk. 5:12, 13; Huan 13:1; 15:13). Anhein hínsiñe habéi gürigia woun wayusurubei sun chansi le wadarirubei lun wapurichihan houn. Uabei ni kata araramutiwa: ni mabahüdün hamaniwa gürigia, ni éibaahouni ni amu katei. Beresebadiwa lau le hariñagubei gürigia ha unbaña wapurichiha ani wapurichihaba houn luagu katei le nidiherigüdübaliña. Aranseñu waba lun wígirun dan lun waturiahan hama ani aranse wagíame luba kada aturiahani.
3. Ida luba líderaguniwa ínsiñeni luagu inarüni tídangiñeti Bíbülia lidan ministeriu?
3 Ínsiñeni luagu inarüni tídangiñeti Bíbülia. Hínsiñeti meha inarüni le tídanbei Bíbülia lun Hesusu, ariha lumuti kei aban irisini (Mat. 13:52). Anhein hínsiñe inarüni woun wapurichihabei lau ugundani ani walugurubaña ha aganbubadiwa lau ugundani ligía. Líderagubadiwa ínsiñeni le, lun mígiraguagüdün wamá woungua lun nérübiu, lugundun ladügüba lun wasaminarun luagu lisudinin uganu le wanügübei lubaragiñe wadiheridun luagu le wásiñarubei adüga.
4. Ida luba warufuduntima ínsiñeni?
4 Arufudatima wamá ínsiñeni. Warufudatimaba ínsiñeni hawagu gürigia ánhawa asaminara luagu lirun gádantiña ladüga ibidiñe lan Bungiu houn, luma luagun ínsiñeni le larufudubei Heowá luma le larufudubei Liráü (Mar. 6:34; 1 Huan 4:10, 11). Ánhawa aturiaha sun dan rárama wagíame asaminara luagun le waturiahabei laganwounduba ínsiñeni le wasandirubei luagu inarüni. Mabulieida waméi ínsiñeni lan aban lídangiñe igaburi le líchugubei sífiri (Gal. 5:22). Lun gayara lan warufuduntima ínsiñeni gayarati wamuriahan luma Heowá lun líderaguniwa luma lun líchuguni lani sífiri sandu woun (Luk. 11:13; 1 Huan 5:14). Meberesenga anhein gürigia wabéi ha aturiahabaña tidan luban furendei, ha lǘhaña arufudaha o ha garufudahaditiña, ánhawa arufuda ínsiñeni súngubei wagía gayarabei máisturugu wamá ha buitiña ha arufudahabarun Lererun Bungiu.