Fánreinti Lánina Álügüdahani

◼ Kaba un wígiroun wani agumeiraguagüdüni?

Wígiruboun houn ha busenbaña haliihanu. Ánhawa ariha luagu hínsiñe lan uganu le wanügübei lun gürigia le aganbubadiwa, buídubei lun wígirun fiú garüdia lun, aban líburu o furumiñeguarügü agumeiraguagüdüni, íbini anhein genege lubéi woun murusunrügübei lan seinsu líchugun o míchubei lan ni kata lun lamainuriniwa wadagimanu lidan sun ubóu (Hobu 34:19; Aruf. 22:17). Mígirun waboun wani agumeiraguagüdüni to gebegitu houn ha mabusenrunbaña haliihanu (Mat. 7:6).

Ida liñati wasubudiruni hínsiñe lan uganu le wanügübei lun somu gürigia? Aban manera dan le warihini luagu aganba lani le wariñagubei ani ayanuha ligía wamá. Dan le lóunabuni wálügüdahan ani ariñagaléi le lasaminarubei. Lau lasigiruni laliihoun bérusu tídangiñeti Bíbülia arufudati inebe tan Lererun Bungiu lun. Anihein dan buídubei lun wálügüdüni anhein laliihaboun lubéi. Mosu wayusurun lichú aau lun wasubudiruni anhein lougua lubéi o weiri lan habusenrun gürigia haganbuniwa. Ligíati, dan le wapurichihan ǘmadarugu míchugunbadiwa agumeiraguagüdüni houn sun ásügürütiña wóubagiñe. Anhein machourun wabalin luagu busén lan gürigia ligía laganbuniwa, buídutimabei wíchugun aban tiraüraü garüdia lun.

Según garüdia to wemegeiruboun lidan apurichihani, tugíaba wanüga lídangiñe damuriguaü, mámaba ladüga gayara lan wíchugun seinsu tuagu. Mama lun lafayeihóun tuagu agumeiraguagüdüni lichugúa budagia; lubaragiñe lira, lun lamainirun sun luwuyeri wadagimanu le adügǘbei lidan sun ubóu lichugúa. Lunti ládahaniwa weteingiradi lun wíchugun lau areini luma tídangiñe sun wanigi lun lawanserun sun luáguti Larúeihan Bungiu, íbini anhein mígiragun lubéi wama (Mar. 12:41-44; 2 Ko. 9:7). Lunti giñe ládahaniwa anügoun agumeiraguagüdüni torügü wemegeiruboun lun wapurichihan, ítarati mabulegun wabéi lúmati óundaruni.

[Ariñahani burí lidan létüra wéinamuti lidan páhina 2]

Mosu wayusurun lichú aau lun wasubudiruni anhein lougua lubéi o weiri lan labusenrun aban gürigia lafurendeirun