Bián gáwanaü

Wíchugun budagia ligía aban lubuidun manera lun wídehan lun lawanserun wadagimanu lánina apurichihani lidan sun ubóu. Gama lumoun, ánheinti mibe lubéi waseinsun?

Lidan aban ókaasion, aba larihin Hesusu aban würi to hilaaru úmari ani gudemetu íchiga bián gáwanaü tidoun gafu to lagei seinsu ténpulurugu. Ínchaha lumutu ínsiñeni le tasandirubei luagu Heowá lun tíchuguni “sun le túmabei lun yebe tawinwandun” (Mar. 12:41-44). Lau letenirun Hesusu lun le tadügübei würi tuguya arufuda lumuti luagu weiri lan meha lebegi tani budagia lun Heowá. Buiti giñe lun wáyeihani hénpulu le hígirubei kristiánugu lánina furumiñeti sígulu. Gúndaatiña meha lau híchugun budagia meberesenga anhein risi habéi o gudeme hamá. Ariñagati meha apostolu Pábulu íbini lan “gudeme hamá” masedóniana ‘ayumuraguatiña saragu lun hígiruniña lun híchuguni hafaran’ (2 Ko. 8:1-4).

Ligíati, íbini anhein biánrügüñein lubéi gáwanaü gayara wamá íchiga, mabulieida waméi lídangiñe lan murusun murusun gayarati lasagarún bandi. Dan le wíchugun tau sun wanigi, gúndaagüda wamuti Wáguchi le siélubei le giñe gíchigadibei, ani “hínsiñehabuti [...] lun le íchugubei lau ugundani” (2 Ko. 9:7).