Fánreinti Lánina Álügüdahani
◼ Ka lunbei ladügüni aban gürigia, anhein busén lubéi lígirun lídangiñe liseinsun o lumegegun o lígiruni lan súngubei lun lóundarun Heowá lárigiñe lounwen?
Dan le lounwen gürigia, mabafuhali luagu le lígirubei (Apur. 9:5, 6). Ligía hadügünbei besafu gürigia aban testamentu o aban gárada to ídanboun híchigei kárugu lun somu gürigia lun hafanreinhani alagan ani afuranguagüda haméi ida liña lan habusenrun lafanreinhóun alagan le lunbei hígiruni (2 Uru. 20:1). Tidan dugumedu tugía iridúati liri gürigia le lunbei lafanreinhani alagan. Lidan saragu ageiraü, dan le lounwen somu gürigia ani mígirunti ni aban dugumedu, aba desidírü lani lúrudu ida luba lan lafanreinhóun lumegegun. Ligíati, anhein samina wabéi wígiruni sun wámati lun somu gürigia o lun óundaruni lani Heowá, mosu wáluahan somu awogóu lun wígiruni bürüñu tidan aban dugumedu ani anúadira wagíame kaba lan afanreinhei. Gayarati hamuriahan lanwoun ariñahani tidan sukursali luagu ligirún budagia tau testamentu o tau amu dugumedu.
Wéiriti luádigimari gürigia le lunbei lafanreinhani alagan le lunbei lígiruni aban gürigia lárigiñe lounwen, mosu lóundaraguni sun umegeguni ligía o seinsu lan, lárigiñe mosu lafanreinhani, sun le barüti dan ani mosu giñe ladügün saragu gararaguaü; según átiriñein lan katei ligía o átiriñein lan lebegi. Rútiña giñe gumadimatiña lúrudu luagu ida luba lan ladügǘn wadagimanu le. Ligíati, mama ladüga lílana lan damuriguaü aban gürigia lun buídubei lan lun lagunfulirun lau wadagimanu lánina lafanreinhóun alagan. Mosu háluahan aban gürigia le gayaraguati lungua, gayarati lafiñerúniwa luagu ani aranseti lun lagunfulirun lau lugundan le hilaalibei (ariha huméi arütíkulu “Los beneficios de la planificación patrimonial”, tidan ¡Despertad! to lánina 8 lidan duusu-hati irumu 1998).
Luádigimari gürigia le anuadirúbei lun lafanreinhan alagan. Anhein amuriaha aban gürigia huma lun hetenirun lun sun lúmati lárigiñe lounwen, furumiñe samina humá buidu, ani lárigiñeme hafurieidun, ariha huméi anhein gayarabei lubéi hagunfulirun lau buligasion ligía (Luk. 14:28-32). Danme le lounwen gürigia ligía, mosu hawisaruniña laburiña alagan. Ítarameme, mosu hagunfuliruni hani buligasion lun hafanreinhani alagan según lúrudu ani según le bürüwañubei tidan dugumedu to lígiruboun hilaali. Gürigia le iridúbei lun letenirun lun alagan, moun lumuti ladügün amu katei luéi le bürüwaalibei tidan dugumedu, gibe lan yebe katei lígirun gürigia ligía o murusun lan. Sun katei o seinsu le igirúti luagu tiri furumiñeguarügü áfisi o sukursali hani gefentiña luagu Heowá lunti lóundarun Heowá (Luk. 16:10; 21:1-4).