Apurichiha waméi uganu buiti “darí lumoun lagumuhóun”
1. Ka buiti hénpulu líchugubei Pábulu woun?
1 “Rúguaba bungua lun bapurichihani uganu [...], gúnfuliba buidu lau buadigimari.” (2 Tim. 4:5.) Lau aban saminaü harumati lariñagei apostolu Pábulu dimurei le lun Timotéu ladüga ligía guánarügü íchugubalin hénpulu. Adügati Pábulu ǘrüwa aweiyasuhani kei mísioneru lidan burí irumu 47 luma 56. Ariñagatu giñe líburu Adügaü ‘ru lan meha Pábulu fe’ luagu uganu buiti houn gürigia darí lumoun lagumuhóun lidan saragu ókaasion (Adü. 23:11; 28:23). Ida luba wadügüni ligiaméme?
2. Ida luba wagunfulirun buidu lau wani ministeriu lidan wapurichihan muna tuagun muna?
2 Lidan apurichihani muna tuagun muna. Añahein gürigia ha maganbunñaha hamagili uganu buiti, gama lumoun lun wadariruniña háfuga mosu wapurichihan lidan ámuñegueinarügü oura. Ánhawa giñe áfurida apurichiha rábounweyu o samudi luma dimaasu háfuga gayarabei wadimurehan hama lichügüdina familia. Mosu wadügüni sun wayaraati lun wayanuhan luma aban gürigia tidan kada muna, lun lira, súdiniti wabürüdüni ka lan muna ídanboun madari wamá gürigia, gayara láamuga wabisidahaniña lidan amu oura. Ánheinti ni lubéi ítara, madarimémetiwa ni aban gürigia háfuga gayarabei wagúarun houn luéigiñe gágamuru o wígirun aban gárada houn.
3. Ka burí chansi hadarirubei lun hapurichihan lidan burí fulasu le ñein lumuti guririguaü luma dan le mama lan muna tuagun muna?
3 Lidan apurichihani lidan burí fulasu le ñein lumuti guririguaü luma dan le mama lan muna tuagun muna. Wagía gefentiña luagu Heowá wasubudiragüdüñein “lichú aau [inarüniti, TNM]” houn sun ha busentiña haganbuni. Anihein dan, apurichihatiwa “ǘmadarugu” o “lidan burí fulasu le ñein lumuti guririguaü” (Ari. 1:20, 21). Áfaaguatiwa giñe wapurichihan dan le wadügüñein lan weberesegun le lánina sagü weyu. Ítarati, gayarabei wariñagun luagu ‘rúguaadiwa lan woungua sunsuinagubei apurichihei Lererun Bungiu’ ani wagunfuliruña lan lau buligasion lánina wapurichihani uganu buiti “darí lumoun lagumuhóun” (Adü. 10:42; 17:17; 18:5; 20:20, 21, 24).
4. Ida luba líderaguniwa furíei luma lasaminarúniwa hulili lun wapurichihani uganu buiti darí lumoun lagumuhóun?
4 Másiñati ñeinbei lan dan leredehaniwa lougua wamá lidan dimurei o somu danimaü luéi wapurichihani uganu buiti, ani chóuruti gunfuranda lani Heowá le wásiñarubei adüga (Sal. 103:14). Gama lumoun, danme le lasuseredun lira, mosu wamuriahan ganigi luma Heowá lun gayara lan wadimurehan (Adü. 4:29, 31). Líderagubadiwa giñe wasaminarun hulili luagu lisudinin uganu buiti lidan waturiahanu Bíbülia wábuguarügü (Fili. 3:8). Ítara luba waganwoundagüdüni ínsiñeni le wasandirubei luagu uganu buiti, línchahabadiwati katei le lun wapurichihan lau ubebeni.
5. Ka gayarabei wadügüni lun wídehan lidan lagunfulirun profesía le labürüdübei Hoeli?
5 Arufudatu liliburun Hoeli lidan aban profesía luagu lubaragiñe lanme lachülürün luéyuri Heowá beresegubaña lan lumutuniña lidan apurichihani ani úabei lan araramutiña (Hoeli 2:2, 7-9). Ligíati, gúnfuli wamá lau wadagimanu le, leme lunbei madügǘnwayaali lanme lidan amu dan.