Lubuidumeraü tesetirun iseri wani tratadu
1. Ka agumeiraguagüdüni tídangiñe to auboun wapurichiha sánsiharuboun esetirun?
1 Lidan adamurini Distritu “Lererun Bungiu inarünibei” le hadügübei gefentiña luagu Heowá lidan irumu 2013 sagawatu seingü iseri tratadu, lárigiñe, ábaya táfuridun amu tanwoun, tratadu Ñunsu luáguti Larúeihan Bungiu númeru 38, to gíriboun Gayarati funa san habagaridunya gürigia ha hilaguaañabaña? Buídumeraüti iseri tesetirun sisi tratadu to. Ka uagu lasansirúa tesetirun? Ida luba wayusuruni iseri ligaburi tesetirun danme le wapurichihan muna tuagun muna?
2. Kaba un líderaguawa iseri ligaburi tadügǘn tratadu burí to?
2 Ka uagu lasansirúa tesetirun? Lun buidu lan lidin woun dan le wapurichihan muna tuagun muna, liibe-agei dan, adüga wamuti ítara: 1) lun wagumeseruni yanu, aba wálügüdüni gürigia ka lan lisaminanbei luagu somu katei 2) aba warufuduni lun ka lan tariñagubei Bíbülia, 3) aba wígirun aban agumeiraguagüdüni lun lun laliihanu, ani 4) aba wígirun aban álügüdahani mounabúnga lubá wagiribudun bisidei amu weyu, ábati wariñaguni lun ídaba lan wagiribuda. Líderagubadiwa iseri ligaburi tadügǘn tratadu burí to lun ménrenguntima lan woun wadügüni gádürügubei katei le.
3. Ida luba wapurichihan tau burí iseri tratadu to?
3 Ida luba wayusurunu? Lárigiñe wabusuragun lun gürigia, gayarati 1) warufuduni álügüdahani súdiniti le luágubei tigibu tratadu lun, le gayarabei lounabún lidan ámuñegueinarügü manera, ábameti wálügüdüni ka lan lisaminanbei, 2) ábame wadaarunu tratadu lun wadimurehan luagu “Le tariñagubei Bíbülia.” Lárigiñe, anhein wariha gayara lan wadügüni, aliiha waméi bérusu ligía tídangiñe Bíbülia, ánheinti gadaani lubéi gürigia, akutiha waméi subtítulu “Ida liña líderaguniwa wasubudiruni katei le?”, 3) derege wamóun tratadu lun amisuraha wameime lun laliihani le líbiri ariñahani danme le gadaani lan, 4) lubaragiñe woudin, arufuda waméi álügüdahani le lábugiñebei subtítulu “Álügüdagua humá hungua” le áfuachubei lidan lagumuhóun páhina lun, ábameti wadügün daradu lun wagiribudun amu weyu óunabei álügüdahani ligía lau tídehan Bíbülia.
4. Ka gayarabei wariñaguni dánmeya wagiribudun bisidei gürigia le arufudubei busén lan lasigirun afurendeira?
4 Ménrengunti giñe wagiribudun bisidaña gürigia ha únbaña wariñaga wagiribuduba lan. Láurügü waliihani bérusu burí le bürüwañubei lidan lagumuhóun páhina lun gürigia, wóunabubei álügüdahani le wígirubei mounabúnga weyu le wabisidahanbalin, ábameti warufudunu tiyawa garüdia Uganu buiti lúmagiñeti Bungiu to tídanboun tratadu lun. Ñéingiñe, gayarabei warufuduni leksióun le ídanbei ladarirúa lanwoun ariñahani libügürü tema le wakutihabei tidan garüdia Uganu buiti lun, ábameti wíchugunu lun. Anhein ánhara tun, ábame wadügün daradu lun wagiribudun aliihoun luma amu weyu. Ítara liña lagumeserúniwa aban aturiahani tídangiñeti Bíbülia. Gayarati giñe lubaragiñe lanme wíchugunu garüdia lun, aba lanme wíchugun ámuya tratadu lun, ábameti wadügün daradu lun wakutihanu luma amu weyu.
5. Ka uagu hu tubéi burí tratadu lidan apurichihani?
5 Barühadiwa lóugiñe san-darandi irumu ayusuroun tratadu lidan wapurichihan. Sánsihali tesetirun luma tueirin, gama lumoun rúharu buiti resultóu woun. Sagá wamá buiti lídangiñe iseri ligaburi tesetirun lun wasigirun aburuchaguagüdei subudi le tídanbei lidan sun Ubóu (Ari. 15:7a).