Barǘ humaña profetagu keisi aban hénpulu: Naún
1. Ka wafurendeirubei tídangiñe liliburun Naún?
1 Ítara kei lariñaguni Naún lidan aban profesía, arihúati lidan le erederubei lídangiñe binadu uburugu Níniwe, fáyeigüda lániña Heowá láganiñu luagu hariban. Úati gayaraati lageindagun luma ni le wügüriduatimabei (Naún 1:2, 6). Gayaraati wafurendeirun saragu katei le gayaraati lahuudun woun lidan wani ministeriu lídangiñe wakutihani lani Naún profesía.
2. Ida liña buidu lan uganu le wapurichihabei?
2 Ru wamá dǘgüdaguaü luma emenigini. Genegeti hamuga luágurügüñein lan laguserawagüdün Níniwe, uburugu hanarimeguti le meha lichügüdinabei binadu ageiraü Asiria, tayanuha liliburun Naún (Naún 1:1; 3:7). Gama lumoun, uganu meha buiti lira houn lumutuniña Bungiu. “Dǘgüdaguaü” mini lan liri Naún ani chóurugüda lumuti houn ha híbiri huríu málühaña lan meha háganiñu agünrinchawagua. Chóurugüda lumuti giñe houn aban lan “aramudaguagülei [Heowá] lidan lidaani idiheri” (Naún 1:7). Barütiwa giñe uganu buiti houn gürigia dan le wapurichihan ani ínchaha wamutiña áluaha aramudaguagülei luma Heowá (Naún 1:15).
3. Ida luba burí wayusurun hénpulu lidan wani ministeriu, kei meha ladügüni Naún?
3 Yusu wamá hénpulu. Adügati Heowá lun layusuruni Naún uburugu ehiptuna Tébasi, le meha hagünrinchagubei asiriana, kei hénpulu lun larufuduni le buga lunbei lasuseredun lun Níniwe (Naún 3:8-10). Danme le wayanuhan hama gürigia luagu lagünrinchawagun ubóu wuribati le, yusu waméi burí profesía tídangiñeti Bíbülia lun warufuduni houn gúnfuli lani Heowá sun le lariñagubei, íbini katei le maweirinbei isudinin. Kei hénpulu, ábürühatiña babilóniana hama médiana luagun Níniwe lidan irumu 632 lubaragiñe lidaani Hesusu. Adügati lanarime huya lun láfuridun duna Tígiri lídangiñe lémeri, le adügübei lun lábürühan lubarieirun uburugu. Ítara liña lagunfulirun lani Heowá profesía libügürü lárügüdüniwa Níniwe (Naún 1:8; 2:6).
4. Ida luba wadimurehan furangu lidan wani ministeriu ménrengun ligíame gunfurandawa lan?
4 Ayanuha wamá furangu lun ménrengun lan gunfurandawa lan. Bürǘ lumuti Naún lani profesía lau aban igaburi le ménrengunti gunfurandawa lan, kamá hamuga labahüdaguña aban dürama ani lau furangu (Naún 1:14; 3:1). Mosu giñe ménrengun lan gunfurandawa lan le wariñagubei (1 Ko. 14:9). Danme le wabisidahan aban gürigia luagu furumiñeti wéiyaasu, ariñaga waméi houn furangu ka lan uagu awanha lubéi ñein. Íderagua wamaña gürigia ha aturiahabarun Bíbülia afiñera luagu Heowá, tuagu Lererun luma lun gunfuranda hamani ka lan buiti lanügübei le hafurendeirubei houn (Rom. 10:14).
5. Ka lachoururagüdübei lani Naún profesía woun?
5 Afiñe lumuti meha Naún chouru lan lagunfulirun le lariñagubei Heowá, ani furanguti larihíniwa katei le tidan líburu tídangiñetu Bíbülia to anügübalin liri. Eibu ayarafadeina lan lagumuchagüle ubóu le lábugiñebei lubafu Satanási, ibihatiwa dǘgüdaguaü lídangiñe füramasei le: “Úati ni aban gayaraati lawügürihóun lun [Heowá] bián wéiyaasu!” (Naún. 1:9).