Hínsiñela lapurichihóun uganu buiti hun

Sandiñahaadün san gürewei lan hun háfuridun apurichiha? Hiibe-agei wádangiñe óunabatiwa lau aban anha lun álügüdahani le. Ka uagu? Háfuga ladüga gabügürügua lan wadunragun hama gürigia ha meberesegúntiña lau uganu buiti o ha wuribati hóuseruniwa. Gayaraati giñe ladüga lan hanufude wamá wadimurehan hama gürigia ha ibidiñetiña woun. Le linarün katei, gayaraati ladügün sun lira lun weferidiruni ugundani le wasandirubei. Gama lumoun, wáhuduraguña lun Bungiu le gúndaabei ani busenti lun weseriwidun lun lau saragu ugundani (1 Tim 1:11, Traducción del Nuevo Mundo; Sal 100:2). Ka ǘrüwa resun buiti wámabei lun línsiñedun apurichihani woun?

Furumiñe, wasubudiragüdüña aban uganu lánina emenigini houn gürigia. Lau sun eferidireina hañalin lan gürigia hemenigin uguñe weyu, gayaraati wabuinchagüdünu hanigi lau ugundani lau “uganu lánina darangilaü” (Isa 52:7). Íbini giñe wagía, gayaraati wabuinchun lau saragu ugundani lau uganu buiti luáguti Larúeihan Bungiu. Lubaragiñe háfuridun apurichiha, sagá humá dan lun hararamagun asaminara luagun abinirúni burí le lunbei lanügüni Larúeihan Bungiu ubouagun.

Libiaman, barüti uganu buiti le wapurichihabei buiti houn gürigia dandu lidan habagari kei lidan hamadagua luma Bungiu. Furendeitiña ida luba lan hígirun échuni mabuidunti luma ida luba lan habihini ibagari magumuchaditi (Isa 48:17, 18; Rom 1:16). Gayaraati wasaminarun wadügüña lan aban wadagimanu lánina haluahóun gürigia lun hesefurúniwa. Lau sun añahein lan mabusenruntiña hesefurúniwa, sigitiwa áluahaña ha busenbaña hesefurun (Mat 10:11-14).

Lǘrüwan, ani le súdinitimabei lídangiñe: ruti wapurichihan uéiriguni lun Heowá. Ligía ariha lubalin kei aban katei le wéiriti lebegi (Isa 43:10; Ebü 6:10). Lanwoun lira, ruti sífiri sandu woun lau saragu areini lun wagunfulirun lau wadagimanu le. Ligíati, ayumuragua wamá lun lun líchugun ugundani woun, aban lídangiñe igaburi le líchugubei lani sífiri sandu (Gal 5:22). Lau lídehan Heowá, gayaraabei wagidaruni anufudei wawariua lun wapurichihan lau ganigi (Adü 4:31). Ligíati, meberesenga ida liña lan hóunabun gürigia lidan fulasu le ñein lubéi wapurichiha, gayaraati wadarirun ugundani lidan wadagimanu lánina apurichihani le ichugúbei woun (Ese 3:3).

ARIHA HUMÉI BIDÉU CÓMO RECUPERÉ LA ALEGRÍA DE SERVIR A JEHOVÁ, LÁRIGIÑE, ÁBAME HÓUNABUNI ÁLÜGÜDAHANI BURÍ LE:

• Ka uagu súdini lubéi wasagarun dan lun waturiahan íbini sügǘ wamá saragu dan lidan apurichihani sagü hati?

• Ida luba wáyeihanu María?

• Ka oura hanúadirubei lun hararamagun asaminara luagun le tariñagubei Lererun Bungiu?

• Ka hínsiñebei hun lídangiñe lapurichihóun uganu buiti?