Le lunbei wadügüni lun hechu wamá aturiahoun Bíbülia

Hínsiñeti hamuga san hun lun úaragua humá lun Bungiu dan le hagagibudagun luma lénrengunga, kei meha ladügüni Danieli? Héchuti meha Danieli aturiahoun Lererun Bungiu ani aturiaha lumuti meha profesía wéiriti lilulin le tídanbei (Dan 9:2). Ida luba líderagunün haturiahanu Bíbülia buidu lun úaragua humá? Gayaraati ladügün lúntima hachoururuni lagunfuliruba lan lani Heowá füramasei (Hos 23:14). Ladügüba giñe lúntima línsiñedun Bungiu hun ani línchahabadün lira lun hadügüni le buídubei (Sal 97:10). Gama lumoun, kaba au hagumesera? Teni humá lun adundehani le asigirubei.

• Ka gayaraabei naturiahani? Lidan aban programa buiti lánina aturiahani, mosu ñeinbei lan aranseruni lubá adamuridaguni. Hasagaratimaba buiti lídangiñe aliihani tídangiñeti Bíbülia le lánina sagü dimaasu anhaün asagara dan lun hakutihani puntu le úabei gunfuranda humani lídangiñe. Añahein íbirigu akutiha hamuti profesía tídangiñeti Bíbülia lun buídutima lan gunfuranda hamani, amu akutiha hamuti kada aban lídangiñe igaburi le líchugubei sífiri o akutihatiña libügürü wéiyaasu lánina apurichihani le ladügübei apostolu Pábulu luma luagu katei burí le ladügübei Heowá geyegu wau. Anhein ñübuin somu álügüdahani hichügüwagun, bürǘ huméi lubá hakutihani dánmeya haturiahan.

• Halíaba nadarira ariñahani? Hadariruba fiu adundehani lidan bidéu Herramientas de investigación para descubrir tesoros espirituales. Lun hagumeserun, akutiha huméi ka lan arúeihani gabafuti mini lubéi kada aban hádangiñe mónsturu ha uágubaña layanuhóua lidan Danieli kapítulu 7.

• Átiribei dan nau aturiaha? Lun léredun humadagua luma Bungiu mosu gabügürügua lan haturiahan. Según harihini, gayaraati hagumeserun aturiaha luagu murusun oura, ábameti aganwoundeina humani dan le hásügürübei aturiaha. Ítara liña taturiahóun Lererun Bungiu kei dan le lachiahan gürigia lun láluahan katei gebegiti: eibu ladarirun, ábatima busén lan lachiahan hulili lun ladarirun lanwoun (Ari 2:3-6). Ladügüba lira, lúntima tínsiñedun Lererun Bungiu hun, hechu huguyame aturiahoun Bíbülia (1 Fe 2:2).

KA MINI HABÉI MÓNSTURU HA UÁGUBAÑA LADIMUREHÓUA LIDAN DANIELI KAPÍTULU 7?

• 

  Dan 7:4

• 

  Dan 7:5

• 

  Dan 7:6

• 

  Dan 7:7

AMU ÁLÜGÜDAHANI:

Ida liña lagunfulirun Danieli 7:8, 24?

LÁRIGIÑE LE, NATURIAHABA LIBÜGÜRÜ:

Ka mini habéi mónsturu ha uágubaña layanuhóua lidan Arufudúni kapítulu 13?