Subuditi San Hun?

Aban binadu abürüdǘni le achoururagüdübalin le tariñagubei Bíbülia

LIDAN fulasu le ñein lubéi larufudahóua binadu burí ílagu le lídangiñeti tidaani Bíbülia uburugu Herusalén, anihein aban dübü lau aban abürüdǘni le lídangiñeti burí irumu 700 luma 600 lb.l.K. Madise luéi uburugu Ebürón (Ísüraeli) ladarirúa dübü ligía, lidan aban lagadábugiñe dübü le meha ayusurúbei keisi umúahaü. Ariñagati abürüdǘni le: “Íñaragualei Yahweh Sabaot Hagaf le liráü Hagav”. Chóurugüda lumuti abürüdǘni le inarüni lan le tariñagubei Bíbülia luagu subudiwa lan meha ani yusua ligía liri Bungiu, Heowá o Yahweh, lidan binadu dan lugundun fuati bürüwañu ñein lidan binadu ebüréu lau burí létüra YHWH. Dariwaali giñe amu burí abürüdǘni lidan lagadábugiñe dübü le meha ayusurúbei keisi umúahaü, le arufudubei kamani lan meha hayusuruni gürigia fulasu burí le lun hadamuridagun o lun haramudagun ani abürüha hamani meha liri Bungiu lóubawagu luma burí amu iri le gagana lumuti liri Bungiu.

Ayanuhatu Rachel Nabulsi, aban sásaamu lidan iñeñein to tídangiñeboun Liñun-agei furendei to uburuguboun Yorya, luagu abürüdǘni burí le ani ariñagatu: “Súdiniti gabügürügua lan layusurún iri YHWH [...]. Arufudati abürüdǘni burí le uágubei wayanuha luma abürüdǘni [le tídanbei Bíbülia] súdini lan meha YHWH houn lílana Ísüraeli luma Hudá”. Chóurugüda lumuti le mama lan tachararuña Bíbülia lau láfuachun liri Bungiu tidan bürüwañu lidan létüra ebüréu YHWH saragu milu wéiyaasu. Gíbeti meha giñe iri le gagana lumuti liri Bungiu.

Dimurei Yahweh Sabaot, le abürüdǘbei luagu dübü le buga uágubei wayanuha, mini lan “Heowá le hábuti súdaragu”. Genegeti arufuda lani lira kamani lan meha hayusuruni gürigia dandu liri Bungiu kei dimurei “Heowá le hábuti súdaragu” lidan tidaani Bíbülia. Chóurugüda lumuti le machara tan Bíbülia lau tayusuruni dimurei “Heowá le hábuti súdaragu”, le áfuachubei 250 wéiyaasu lidan Abürüdǘni Ebüréu, tídantima liliburun Isaíasi, liliburun Heremíasi tuma liliburun Sakaríasi.