“Chülüti dan lun larufuduni laganbadi”

Gaganbadigubeiñein Hesusu lun Heowá (Huan 8:29). Ligíati, ka uagu tariñaga ‘chülǘ lan dan lun larufuduni laganbadi’ lau lawanduni asufuriruni? (Ebü. 5:8).

Dan le ya lubéi Hesusu ubouagu, gagibuguati meha luma lénrengunga le marihin lubéi sielu. Kéiburi, íbini hínsiñe lan meha Heowá houn lagübürigu, charatiña ani mosu meha gaganbadi lan houn (Luk. 2:51). Súfuriti giñe háhaburugun alidihatiña relihión luma háhaburugun gumadimatiña ha wuribabaña (Mat. 26:59; Mar. 15:15). Lanwoun lira, aba hasufuriragüdüni darí lounwen. Ligía tariñagunbei Bíbülia: “Aba lǘnabudaguagüdüntima lungua, ani ladüga laganbadi, aba lounwen” (Fili. 2:8).

Adügati sügǘ burí le lun lafurendeirun Hesusu gaganbadi lidan burí igaburi le mawinwandunñaha lágili. Ítarati, aba liabin lun ábanhali lan Urúei luma lun ábanhali lan Fádiri Íñutimati mafigounti, le gayaraabei gunfuranda lani buidu le wásügürübei (Ebü. 4:15; 5:9). Kei aba lubéi larufuduni Hesusu gaganbadi lan lun Heowá lau lawanduni asufuriruni, aba gebegitimahali lan lun Heowá. Gayaraati lariñawagúniwa ligiaméme wawagu ánhawa arufuda gaganbadi danme le wásügürün lídangiñe lénrengunga (Sant. 1:4).