Hiñuragun lídangiñe lénrengunga

KA UN LAHUUDA?

Íderagua lumutiwa igaburi le agagibudagua luma lénrengunga mábürühan láamuga warüna dan le masali lan katei woun buidu. Sügǘ burí le wawinwandubei ídehabei lun wafurendeiruni igaburi le. Ítara kei mafurendeirunbei lan irahü éibuga machugeragunga, mafurendeirunbei giñe iñuragua lídangiñe lénrengunga másügürünga lídangiñe turobuli.

KA UAGU SÚDINI LUBÉI?

Añahein irahüñü, féridi hamuti haguraasun dan le masali lan somu katei houn, dan le hénrengu lan o dan le lererehóun houn luagu ani añahein hádangiñe, aba máhaaña lan hadügüni. Mégeitiña lubeiti irahüñü gunfuranda hamani le:

• Ua lan ni aban gürigia le adügüti sun katei buidu súnwandan (Santiagu 3:2).

• Chülǘ lan dan woun súngubei lun wagagibudagun luma burí sügǘ hénrenguti (Apurichihati 9:11, TNM).

• Dánrügüñein lan lariñawagún woun ka lan wadügübei wuriba, wafurendeira adügei katei buidu (Ariñawagúni 9:9).

Anhein afurendeira hisaani iñuragua lídangiñe lénrengunga, gayaraabei lagagibudagun luma turobuli.

IDA LUBA HAFURENDEIRUN IRAHÜÑÜ IÑURAGUA LÍDANGIÑE LÉNRENGUNGA?

Dan masali lan somu katei houn buidu

ADUNDEHANI TÍDANGIÑETI BÍBÜLIA: “Íbini héiguadun [gürigia ha harumabaña] sedü wéiyaasu, hásaarayaba” (Ariñawagúni 24:16).

Íderagua huméi hisaani arihei katei keisi lubudubu. Kéiburi anhein wuriba lubéi lidin lun lidan somu egüsámini leskuelarugu, kaba ladüga? Leferidirubei san luguraasun, ariñaga ligíame: “Úati ni kata nadügün buidu!”?

Lun lafurendeirun hisaani iñuragua lídangiñe lénrengunga, íderagua huméi asaminara luagun le gayaraabei ladügüni lun buídutima lan lasalirun katei lun dánmeya ladügüni. Líderagubei lira lun láfaagun lun laransehani turobuli luma lun lagidarun íruni luéi.

Maranseha huméi lituróbulin, íderaguarügü huméi aransehei lungua. Gayaraati hálügüdüni: “Ka gayaraabei badügüni lun buídutima lan gunfuranda bani le arufudahóubei bun leskuelarugu?”.

Dan lasuseredun somu katei wuribati

ADUNDEHANI TÍDANGIÑETI BÍBÜLIA: Ibidiñeti hun “kaba lan asusereda haruga” (Santiagu 4:14).

Ibidiñeti lun gürigia kaba lan asusereda lidan libagari. Gayaraati leferidiruni lirisin o látuadi sódini. Kei tariñaguni Lererun Bungiu, mama súnwandan “hagañeiruni ha furesebaña éibaaguni, ni ha hérebaña wuribu, [...] lugundun chülüti dan luma sügǘ le magurabúnti houn sun gürigia” (Apurichihati 9:11, TNM).

Lau sun gunfurandawa lan hadügübei lan sun hiyaraati lun hóunigiruni hisaani luéi furumiñeguarügü denchaü, le linarün katei, siñabei hesefuruni súnwandan luéi sun turobuli le úmati lagagibudagua lidan libagari.

Háfuga machülügili lan hisaani lidoun irumudiri le ídanbei gayara lan leferidiruni luadigimari o léiguadun lidoun gudemei, íbini ítara, másiñati lagagibudaguña lan luma amu burí turobuli, kéiburi leferidirun somu lumada o lounwen somu liduhe.a

Dan le lererehóun houn lun buídutima lan hadügüni katei

ADUNDEHANI TÍDANGIÑETI BÍBÜLIA: “Aganbabá eweridihani, anha buguyame lun ererehóuni, ítara luba biabin lun lachuudun bau” (Ariñawagúni 19:20).

Dan le lererehan somu gürigia lun hisaani luagu somu katei le ladügübei wuriba, mama láluguña láseirunu lanigi, lálugarügüña líderaguni asansira somu umenei o igaburi le mabuidunti luagu.

Arufudaha humá lun hisaani anhein lan ánhara lun eweridihani le ichugúti lun, hesefuruba lan dandu huguya kei ligía luéi saragu asufuriruni. Ariñagati aban úguchili gíriti John: “Anhein haransera sun turobuli le ídounbei hádaragua hisaanigu houngua, mafurendeirunbaña. Ítara haba áfurida lídangiñe aban turobuli luma ebelura lidoun amu, ábameti herederun hárigi hárigi aransehei chagaguaü le hadaagubei. Lagifidagüdübei lira hibagari luma habagari hisaanigu”.

Ka gayaraabei hadügüni lun híderaguni hisaani ánhara lun ererehóuni? Danme le lererehóun lun, leskuelarugu o lidan amu fulasu, ragügua humá hungua luéi hariñagun madüna lani ererehóuni ligía. Lubaragiñe lira, álügüda huméi:

• “Ka funati uagu ladeinhóua bun?”.

• “Ka gayaraabei badügüni lun buídutima lan badügüni katei?”.

• “Kaba badüga dánmeya lasuseredun ligiaméme bun?”.

Haritagua huméi mámarügübei lan guentó lahuuda ererehóuni lun hisaani, gayaraabei giñe líderaguni danme le wéiriaali.