Ligaburi hasandiragun hungua

IGAÑI

ADUNDEHANI TÍDANGIÑETI LERERUN BUNGIU: “Buítimati gaguraasuni sügǘ lau ganigi” (Ariñawagúni 16:32).

KA UAGU SÚDINI LUBÉI? Súdiniti wafurendeirun árügüdagua woungua. Lau sun anihein lan dan gébuna lan wagañidun, ánhawa márügüdagun woungua, gayaraabei wagadeiruni sun katei. Arufudúaali dan le lan márügüdagun lan gürigia lungua luéi igañi, ariñagati o adügati katei le uágubei lasaküriha lárigiñe.

LE GAYARAABEI HADÜGÜNI. Furendei humá árügüdagua hungua luéi ladügün higañi lun hóuserun wuriba. Añahein gürigia afiñetiña harufuduña lan here hamá dan le hígiraguagüdün houngua lun hagañi ani le linarün katei, arufudarügütiña débili hamá. Ariñagatu Lererun Bungiu: “Ítara haña gürigia ha mágüdaagunbaña houngua, kei uburugu mabarieirúnti” (Ariñawagúni 25:28). Anhein hakutiha kátima lan asuseredubei, líderagubadün lun hárügüdagun hungua. “Ragüguaü unguaü luéi agañiduni ligía lubuidunbei ichügü” (Ariñawagúni 19:11). Lídehaba híchugun arigei lun le hariñagubei sun ha gádanbalin turobuli le adügübei lun hagañidun, lun gunfuranda humani katei buidu luma lun darangilu humá.

ETEINGIRUNI

ADUNDEHANI TÍDANGIÑETI LERERUN BUNGIU: “Geteingiradi humá” (Kolosana 3:15).

KA UAGU SÚDINI LUBÉI? Añahein ariñagutiña gürigiarügüñanu lan ha geteingiradibaña gayara gunda hamá. Íbini ha sügühañabaña lídangiñe óunwenbu burí lamiselu ariñagatiña inarüni lan katei le. Ariñagatiña ariha hamaali lan houngua dan le lan sandí hamá eteingiruni luagu le anihaguabei hama lubaragiñe herederun asaminara luagun le heferidirubei, íderagua lániña lira lun hawanduni le gádanbaliña.

LE GAYARAABEI HADÜGÜNI. Sagü weyu, bürǘ humá katei le uáguti hasandira eteingiruni. Mama mosu weiri lan, gayaraati katei lan ñǘbüriti kéiburi harihini lubuidun láfuachun Weyu, hayanuhan darangilañu luma somu hiduhe o humada o ladügarügü hásügürün ábanya weyu lau ibagari. Ánhadün áfaagua lun hafalaruni adundehani le, labuiduruba hasandiragun hungua.

Gayaraati giñe líderagunün heteingiruniña hiduheñu hama humadagu. Samina humá luagu katei le hínsiñebei hun hawagu ani ariñaga huméi houn tidan aban gárada, luéigiñe Internet o gágamuru. Ítara luba buítima lan hanaagun hungua hama amu ani hasandirubei ugundani le lanügübei hadügün katei buiti hawagu amu (Adügaü 20:35).

AMU ADUNDEHANI TÍDANGIÑETI LERERUN BUNGIU

MÉRERAGUA HUMÁ

“Ítara liña lagumeserun wuribu kei liñurun duna, buítimati ladisedúniwa luéi, sügǘ lau ládarawaguniwa unguaü lidoun” (ARIÑAWAGÚNI 17:14).

MADIHERIDA HUMÁ SARAGU LUAGU LE MASUSEREDUNGILIBEI

“Madiherida humá lubeiti luagu haruga, ladüga barǘ lumuti giñe haruga lidiheridüna lúmagua. Buídurügüti lénrengunga le lanügübei kada weyu” (MATÉU 6:34).

SAMINA HUMÁ LUBARAGIÑE HADÜGÜN SOMU KATEI

“Lóunigirubadibu lichú bau luma gunfurandaü le bídanbei súnwandan” (ARIÑAWAGÚNI 2:11).