Le hafiñerubei fiu

Indú

Afiñetiña indú ladüga lan katei burí wuribati le wadügübei lidan ibagari le o lidan amu ibagari, wasufurirunbei. Masufurirunhali lan gürigia dan le lachülürün lidoun moksha, dan le ídanbei lesefura gürigia luéi nasiruaya lan saragu wéiyaasu. Lun libihini lira, mosu lachülürün lidoun dan le ídanbei madiheridunhali lan luagu katei le lánina ubóu le.

Musulmán

Saminatiña musulmán aban lan abeichúni luagu figóu asufuriruni ani aban lan óuchawaguni lun afiñeni. Ariñagati Sayyid Syeed, aturiahati habügürü gürigia le arihibei tau Óundaruni hani Islamü to Nóruteboun Meriga, haritaguagüda lániwa asufuriruni “lunti lan weteingiruni Bungiu súnwandan luagu sun abinirúni le líchugubei woun ani lunti lan wíderaguniña ha mégeibalin”.

Ha afalarubalin hafiñen huríu

Según harufudahan huríu, súfuritiwa ladüga katei burí le wadügübei. Luagu amu oubaü, añahein huríu ariñagutiña ñeinbei lan aban águyuguni ani ábame lan ladügǘn irichaü houn ha asufurirubaña mébunouga. Ánheinti lidan habahüdagun huríu, arufudahóuati nasiruaya lan gürigia saragu wéiyaasu, le íchugubei saragu chansi lun lun lafayeihan luagu lifigoun.

Ha áhuduragubaña lun Buda

Afiñetiña ha áhuduragubaña lun Buda nasiruaya wamá saragu wéiyaasu ani súfuri wamá lidan kada ibagari darí wesefurun luéi le wayumahabei, le wadügübei luma luéi katei wuribati le wasandirubei ani adüga lan lichú lau gürigia, lubuidun burí katei le ladügübei luma lárügüdagun lungua luéi le lasaminarubei lun lachülürün lidoun nirvana, lidan amu dimurei, dan le ídanbei ua lan asufuriruni.

Ha afalarubalin larufudahan Konfusiu

Según Diccionario de religiones comparadas, afiñetiña ha afalarubalin larufudahan Konfusiu “ladügatima lan hachara gürigia” anihein lubéi asufuriruni. Arufudahatiña giñe íbini lan gayara lan lagidarun gürigia lídangiñe lasufurirun lau lanügün aban ibagari buiti, “habafu lan sífirigu ha uágubaña mabafu hamá gürigia lébunabei liibe-agei asufuriruni. Lidan burí kesi le, siñati ladügün gürigia amu katei luéidigia lánharun lau gálumaü lun lugumadin Hado o Sinu”.

Hani burí türibu relihión

Anihein burí türibu le ídanbei larufudaha hani relihión ladüga lan abiñarahani anihein lubéi asufuriruni. Añahein gürigia afiñetiña gayara lan hadügün gabiñarahatiña lun buidu lan lidin lun aban gürigia o lun lasuseredun somu lamiselu lun ani gayara lan ladügǘn fiu beresegu lun lagaranihóun lun abiñarahani burí ligía. Ligíati dan le lubéi lasandirun somu gürigia, aba houdin áluaha buyei lun layusuruni lárani luma lun ladügün fiu beresegu lun lagidaruni wuribani le ladügübei gabiñarahati.

Ha ariñagubaña kristiánugu hamá

Afiñetiña kristiánugu ladüga lan figóu le ladügübei furumiñeti wügüri tuma furumiñetu würi anihein lubéi asufuriruni, kei larufuduni abahüdaguni le tídanbei líburu tídangiñetu Bíbülia to gíriboun Agumesehani. Íbini ítara, anihein saragu relihión le íchugubei lanwoun le tariñagubei Lererun Bungiu. Kei hénpulu, añahein katoliku afiñetiña gayara lan hederegeruni hasufurirun keisi adagaragüdüni lun Bungiu lun labinirunu ligilisi to ñein habéi o lun lesefurun amu gürigia.