KABA ASUSEREDA LUN UBÓU?

DUNA

ANHEIN ua duna, úabei hamuga ibagari ubouagu, dúnatima le ahuudubei lun watun. Le linarün katei, sun ha gabagaribaña ubouagu, dúnatima lubuñabei hágubu. Siñabei hamuga hatun gürigia hama animaalugu duna lun hamuga ua lan duna le lídangiñeti lagunu, duna éibaaguati, le lídangiñeti fulasu dǘdügati luma le lábugiñeti múa. Siñabei hamuga giñe háturaguni hanadüri.

Alouguadeina liña duna

Lau sun dúnatima lan gíbebei ubouagu, según Organización Meteorológica Mundial, “0,5 lídangiñe san duna le aniheinbei, ligíarügüñein gayara layusurún lun latún”. Íbini genege lan murusunrügüñein lan, buídurügüti lun lágüdahani ibagari. Lau sun lira, eibu lásügürün dan, hénrengutimahali libihíniwa duna ani wíyetimahali. Susereti lira ladüga asansireina liña lan ligaburi dan ubouagu ani eibu lásügürün dan, wawesiruña saragu duna. Afiñetiña aturiahatiña kéiburi lan 30 irumu lárigiñe le, úaalime duna lun hatun 5,000 míñunu gürigia.

Adügǘwati Ubóu lun ñein lan ibagari

Adügǘwati Ubóu le lun ñein lan duna le nófuti houn sun ha emegeirubalin. Anihein katei lidan ligaburi ladügǘn Ubóu, múa, katei dúnaruguna luma lileitin weyu le ídehabei lun larumadun duna. Ariha wamá fiu katei le arufudubalin adügǘwa lan Ubóu lun ñein lan ibagari:

Arufudúaali gayara lan larumadagüdüni múa duna. Arihúaali giñe lidan burí lan fulasu le ñein lubéi lagürücha duna anuhein burí nadü to agidarubalin nitróhenu, fósforo luma katei péisiniti lídangiñe duna.
Furendeihaña aturiahatiña siensia ida liña lan lídehan ligaburi ladügǘniwa Ubóu lun larumadun duna. Dan le léibaagun duna, aba lagubudagun katei péisiniti le lídanbei ani ídehatiña bacteria ha lídanbaña duna lun hagumuchaguagüdüni.
Ídehatiña burí gureme o síndiri lun hachawaruni katei péisiniti le dúnarugubei lídanrügü fiu weyu, buídutimati ligaburi hadügüni sügǘ lau aban máhina le ayusurúbei lun larumadahóun duna.
Anihein lubéi duna ubouagu ladüga giribu lan duna súnwandan huánriñurugun lun lasaliragun dúerime lárigiñe aba lasaliragun lun húyame le áhuyubei. Ídehati katei le, lúmaya amu igaburi, lun magumuchun lan duna ubouagugiñe.

SUBUDITI SAN HUN?

Ítara liña múa kei aban áseiragülei

Gabafuti múa lun láseihani duna. Adügati katei le lun lagidarun lárigirugu gürabu o katei líbeina lira lídangiñe duna, katei burí péisiniti o amu burí katei le awiyedagüdübalin duna. Dan le lidin duna ǘnabun, aba buíduhali lan lun latuniwa.

Láseihani sagoun duna

Áseiha lumuti sagoun luma lirahüñü burí dübü le lídanbei duna ladüga mígirunti lun lásügürün katei burí le awiyedagüdübalin lidoun.

Harumadahani bacteria duna

Dariwatiña burí bacteria múarugu ha ídehabaña lun lagumuchagun katei burí péisiniti le lídanbei duna le gayaraabei ladügün lun hasandirun gürigia. Añahein hádangiñe bacteria hagía gayaraati hagumuchaguagüdüni agülei luma hasaliraguagüdün katei burí péisiniti lun garabalime wíyeti luma lun dúname.

Lagumuchun sagoun le gaganabei elekütrisida lau péisini le lídanbei duna

Anihein burí sagoun le gaganati elekütrisida, íbini mibe lan, le gayaraati lachawahani katei burí péisiniti le lídanbei duna luouguoun, kéiburi life amonio le gagahüdadibei le denchabei houn sun gabagaritiña ha dúnarugubaña.

Laluahóun lárani turobuli le

Fiu iyawaü lidan aban: 1. Aban wügüri akakürei huyu le tuágubei likarün le ñéingiñe lubéi láwiyuha agülei. Yúsuti aban ágeidinaü lun máwiyurun lan agülei ligía múarugun. 2. Aban wügüri le anügübalin budéin burí le lauti katei péisiniti tidoun aban fábürika le ñeinba lubéi lagumuchúa lau keisi lubudubu. — Anhein waransera huyu burí le ñéingiñe lubéi láwiyuha agülei, gumú wagíame lau burí budéin o amu katei le gaganati katei péisiniti keisi lubudubu, wídehaña lun harumañu lan duna.

Ariñagatiña aturiahatiña moun lumuti lan wawesiruni duna. Ani lun mawiyedúniwa lan duna, ariñagatiña lunti lan waranseruni furumiñeguarügü huyu tuagu wagune le ñéingiñe lubéi lédedeha agülei, lun mágurun wamá árani tidoun kumú, méserun wagíame katei denchati lidoun léibaaguagüle duna wíyeti.

Añahein inhenierugu adügatiña ámuñegueinarügü katei lun lagidarúniwa salu lídangiñe lidunari barana, lun ñein lan duna le gayaraati latuniwa.

Lau sun lira, úati buídurügü lan wadügüni burí katei le. Siñati layusurúniwa igaburi le lidan saragu fulasu, séruti ani chawati saragu leiti. Ariñagati aban ariñahani túmagiñeti Óundaruni hani Néchani lidan irumu 2021 luáguti layusurún duna: “Mégeigili lun ladügǘniwa saragu katei lun lounigirúniwa duna le wátubei”.

Anihein funa san emenigini? Ka tariñagubei Lererun Bungiu?

“Iñuragüda lumuti [Bungiu] lédedehan duna, lárigiñe aba ladügüni húyame. Ésehati huya lídangiñe dúeri, aba lábürühan guran hawagun gürigia” (Hobu 36:26-28).

Lun lounigirún duna ubouagu, adügati Bungiu lunya lagiribudun duna lidoun fulasu le ñéingiñe lubéi láhücha (Apurichihati 1:7).

Samina humá luagun le: Anhein adügagubeiñein lubéi Bungiu lun larumadun duna, gabafuti giñe lun laranseruni sun damichi le adüga hamaalibei gürigia lun. Aliiha huméi ariñahani “Ariñagaali Bungiu labuidurayaba lan Ubóu” lidan ubanaü 15 le tídanbei garüdia to.