Lagumeseruni Bungiu katei

SUN buiti lúmagiñe Bungiu liabin woun. Ligía adügübalin Weyu lun líchugun leiti woun wéyuagu, luma Hati tuma waruguma lun híchugun leiti woun guñoun. Luma Ubóu lun waganóun ñein.

Gama lumoun Weyu, Hati, waruguma luma Ubóu mama ligía furumiñeti katei ladügün Bungiu. Subuditi bun katei lan? Gürigia burí kei ligía. Siñati warihiniñu, kei siñá lan warihini Bungiu. Ánheligu tagúahan Bíbülia houn. Adüga lumutiñu Bungiu ánheligu lun hawinwandun luma sielu.

Le furumiñeti ánheli le ladügübei Bungiu espechaliti meha. Ligía furumiñeti liráü Bungiu, ani nadagimeinti luma lúguchi. Íderagua lumuti Bungiu adügei sun líbiri katei. Íderagua lumuti adügei Weyu, Hati, waruguma burí luma Ubóu.

Ida liña meha Ubóu lidan dan ligía? Lidan lagumeseha úati meha gayarati lawinwandun Ubouagu. Ábanrügüñein meha óunwenbu barana le adouragubei lau sun katei. Ani busenti Bungiu lun hawinwandun gürigia Ubouagu. Ligía aba lubéi lagumeserun aransehei wabá. Ka ladügübei?

Furumiñe mégeiti meha Ubóu leiti. Ligía ladügünbei Bungiu lun ladurangun Weyu ligibuagu Ubóu. Adüga lumuti le, lun gayara lan ñein lan guñoun luma wéyuagu. Lárigiñe aba liñuruni múa ligibuagun lidunari barana.

Furumiñe úati meha ni kata ligibuagu ubóu. Ítara liña meha kei dibuhu le barihibei ya. Úati meha fuluri ni tídibu wewe ni animaalugu. Úatiña meha úduraü baranaha. Gíbeti meha lunti ladügüni Bungiu lun gayara lan hawinwandun animaalugu hama gürigia aban ibagari buiti Ubouagu.