Danieli haganagua liñún

AÜ! LARIHIN kama hamuga lídanñein turóbuli Danieli. Gama lumoun madügüntiñu liñún dañu lun! Subuditi bun ka lan uagu? Ka ádarubalin Danieli haganagoun liñún ha? Ariha waméi.

Guentó aban wügüri gíriti Daríu lurúeitebei Babilónia. Wéiriti línsiñe Danieli lun ladüga sábiuti ani buidu ligía, ábati ladügüni Daríu abanme gumadimati wéiriti lidan larúeihan. Ligíati, gimuga habéi fiú wügüriña lun Danieli.

Aba houdin lumoun Daríu aba hariñagun lun: ‘Urúei, busentiwa, lun badügün aban lúrudu le ariñagati lun ua lan ni aban ayumuraguti lun ni aban bungiu ni lun aban wügüri luéidigia bun luagu 30 weyu. Le adüraaguti, mosume lagurún haganagoun liñún.’ Ibidiñeti lun Daríu ka lan uagu habusenrei wügüriña ha lúrudu le. Ani afiñeti buidu lan saminaü le, aba labürüduni lúrudu. Guentó siñati lasansirawagún.

Danti le laganbunbalin Danieli katei le, aba lidin lúbiñoun afurieida kéiñaha ladügün súnwandan. Subudi hamuti wügüriña wuribatiña ha mígirun lubéi lan Danieli lafurieidun lun Heowá. Ábati hagundaarun, ladüga genegeti hibihaali lan le habusenrunbei lun halíbürerun luéi.

Dan le líchugun urúei Daríu fe luagu ka lan asuseredubei, aba lírudagun. Gama lumoun siñati lasansirawagún lúrudu, ani mosu lóunahan lun lagurún Danieli lidoun huyu le ñein habéi liñún. Ábati lariñagun urúei lun Danieli: ‘Agurabahatina lun lesefurunibu Bubungiute le unbei beseriwida.’

Wéiriti lidiheri Daríu darí lun siñá lan larumugun áriebu ligía. Larugan binaafin aba léibaagun lidoun huyu le ñein habéi liñún. Ariha bumuti ñein. Aba lagúaragun: ‘Danieli, lubúein Bungiu le wínwanbei! Sefu lumutibu san Bubungiute le unbei beseriwida?’

‘Óunaha lumuti Bungiu lani ánheli,’ liña lóunabun Danieli, ‘aba ladouruni hayuma liñún lun madügün hamá dañu nun.’

Wéiriti lugundan urúei, ábati lóunaagüdün asagarei Danieli lídangiñe huyu. Aba hagurún wügüriña wuribatiña ha haganagoun liñún ladüga houchun lun halíbürerun luéi Danieli. Lubaragiñebei hadagarun lurageirugu huyu, aba hárügüdüniñu liñún, aba hañaünrüdaguni sun habu.

Ábati labürühan Daríu houn sun gürigia lidan larúeihan: ‘Inebewa lan Lubungiute Danieli. Ligía adügübei milaguru hanarimeburiti. Ligía esefurubalin Danieli luéi héigini liñún.’