Hesusu ténpulurugu

ARIHABEI nibureinti le ayanuhabei hama wügüriña wéinamuhaña. Máisturugu wügüriña ha tidan litenpulun Bungiu Herusalén. Ánheinti nibureinti lira, Hesusu. Duusu irumu lau guentó.

Wéiritu hanigi máisturugu luagu bandi katei le lasubudirubei Hesusu luagu Bungiu luma burí le bürüwañubei tidan Bíbülia. Gama lumoun, ka san uagu ua lubéi Hosé ya tuma María? Halíañanu funa san? Ariha waméi.

Sagü irumu lidin Hosé hama lufamilia Herusalén lidan aban fedu espechaliti le unbei lagúahoua Luéyuri Esefuruni. Díseti wéiyaasu le hadügübei Nasarétügiñe chülǘ Herusalén. Úatu meha ugunei, ni karü ni íngini. Éibugarügütiñu meha gürigia, ǘrüwañein meha weyu lau Hosé hama lufamilia éibuga lun hachülürün Herusalén.

Lumoun dan le wéirihali lufamilia Hosé. Guentó mosu letenirun houn fiú lamulenu Hesusu ha ñǘbürigiña. Lidan irumu le, lagiribuduña Hosé tuma María hau hasaanigu lun Nasarétün. Haritagun yebe luagu anite lan Hesusu hadan híbiri gürigia ha giñe ñǘbuinbaña. Gama lumoun dan le hararamagun lidan larabachun Weyu, madari hamuti. Aba háluahani hadan haduheñu hama hamadagu, ani úati ñein! Ábati hagiribudun Herusaléun lun háluahani ñein.

Lagumuhóun aba hadariruni ya. Nihán aganbahaña arufudahatiña luma álügüdaguaña. Wéiritu hanigi sun gürigia luagu lichú lau. Gama lumoun aba tariñagun María: ‘Niráü, Ka san uagu badügei katei le woun? Nuguya luma búguchi wáluahañadibu lau idiheri.’

‘Kagia uagu háluahana?’ liña lóunabun Hesusu. ‘Ibidiñeti san hun luagu lunti lan nerederun ya lúbiñe núguchi?’

Anha, hínsiñeti lun Hesusu lerederun le ñein lubéi gayara lan lafurendeirun luagu Bungiu. Mosu giñe ítara wamá, adián? Yágüta Nasarétü, ñǘdünti meha Hesusu lidan adamuridaguni le lánina áhudurawaguni sagü dimaasu. Ladüga maní liña lan aganbaha súnwandan, furendeitiha bandi katei tídangiñeti Bíbülia. Áyeiha waméi lani Hesusu hénpulu.