Gunda humá lau hibagari lidan aban kei familia

Inarüni funa san gayara lan hagundaarun familia?

Ida?

Subuditün san familia gundatiñu ani úara hagía kei ha harihubaña tidan garüdia to? Lidan sun fulasu hafánreinraguña familiagu. Ígiraguni, machouruni lidan wadagímanu luma burí turóbuli le umabei hadunragua agübürigu ha manibaña weiriei o weiriou ligía fíu lídangiñe lébuna lénrengunga. Aban sásaamu lidan subudi hawaguti familia aba terengun lau íruni: “Uguñe lidan sun ubóu subudiwaali le ariñawagubei luagu hagumuchaguña lan familia”.

Ka uagu liabingua turóbuli wéinamuti hadan burí familia guentó? Ida luba gayara lan wagundaarun lau ibagari lidan familia?

Latatiraha familia

Lun lóunabun álügüdahani burí le, mégeiwati lasubudirunua latatiraha maríei luma familia, kei le —⁠Bungiu​— lubéi adügübani aranseruni lánina familia, mosu haluahani lílana burí familia lun ladundehaniñu, ladüga ligíarügübei asubudirei ida luba lan wagundaarun lau wabagari lidan familia.

Súdiniti gibe hamá gürigia afiñetiñu ua lan adügüti aranseruni lánina familia. Afuranguagüdatu The Encyclopedia Americana: “Fiú sásaamu ariha hamuti latatiraha maríei kei harihini haganóun animaalugu ha ubouagubaña lubaragiñe wügüri”. Gama lumoun, ayanuhati Hesukrístu luagu ladügǘn wügüri tuma würi. Yusu lumutu binadu abürüdÿni tani Bíbülia kei gumadi, aba lerengun: “Ligía moun lubéi lafanreinraguni wügüri le ladunraguagüdübei Bungiu” (Matéu 19:4-6).

Garichati Hesukrístu. Aban Bungiu ganichiguti adügübaniñu furumiñetiñu gürigia garaüwarügütiñu ani rulumuti le mégeiwabei lun habagaridun lau gundaü hama hafamilia. Marieigüda lumutiñu Bungiu furumiñeti wügüri tuma furumiñetu würi ani erengati luagu wügüri ‘mosu lan laganóun tuma lúmari (o lani weiriou) ábame hayabin lun ítara haba lan kei ábanrügü gürigia’ (Agumesehani [Génesis] 2:22-24). Gama lumoun, turóbuli le gádanbaliñu familia guentó, gayarati san ladüga lan hasigirun ámuñegueinarügü ligaburi awínwanduni le kóntürati luagu lilúrudun Bungiu le furangubei tidan Lererun, to Bíbülia?

Ida liña gayara lan labihin awanseruni?

Chóuruti subudi humani, agumeiraguagüda lan iseri ubóu le saminaü lun hawouguarügün lan gürigia haritagua luma lun hachülürün lidoun tima liñu ubafu. “Buiti memenihabuni —⁠liña aban sásaamu lidan bísinisi lun aban sétanu merigana ha luntiñu güraduarua hamá tídangiñe luban furendei íñutu⁠—. Gayarati memenihabu lan gürigia, lau sun lira, gundati luougua.” Gama lumoun, laluahonua irisini luma umegeguni manügünti lidoun awanseruni. Ligía, laluahounua irisini luma umegeguni lidanñein óunwenbu burí katei le asíadirubani habagari familia, mígirunti lun buidu lan hanaagun gürigia hamagua ani gidalumuti harisin luma hadaani. Saminarügü humá luagu le larufudubei biama ariñawagúni tídangiñeti Bíbülia luagu ka lan súdinibei lun libihinua ugundani:

“Buítimati lun teigín fagudiya lau ínsiñehabuni, sügü lau leigín wiñaadu lau iyereehabúni”.

“Buítimati teigín fein deretu lidan abagariduni darangilati sügü lau saragu fedu tidan aban muna ñein lumuti wuribu” (Ariñawagúni [Proverbios] 15:17; 17: ​1).

Dimurei deregüdati, adián? Saminarügü humá ámubei lan yebe ubóu anhaña hamuga burí gaganbadi sun familia lun lúrudu súdiniburiti le! Rutu giñe Bíbülia adundehani huuti luagu ida luba lan hóuseragun lílana familia hámagua. Ariharügü humá fiú lídangiñe arufudahani le tíchugubei:

Wügüriña maríeitiñu: ‘Lunti lan tínsiñedun lúmari wügüri o lani weiriou lun kei línsiñe lúgubu guánarügü lun’ (Éfesuna 5:​28-30).

Aban adundehani sensiyuti, ani huuti! Rutu giñe Bíbülia gumadi lun wügüri maríeiti ‘ru huméi tufulasun hani weiriou tun’ (1 Féduru 3:⁠7). Lun lira, mosu larufudun espechali ateniruni tun, mosu areida lan tun gufuranda lounme adüga ligíame lun chouru lan tasandiragun tungua. Ítarameme, mosu giñe línsiñedun le tasaminarubei lun ani aganba lounme (konpararü humá luma Agumesehani 21:12). Ma buiti hamuga houn sun familia ánhaña housera wügüriña hani weiriou buidu ítara kei habuseerun buidu lan houserunua? (Matéu 7:⁠12.)

Oubafurugu o würiña maríeitiña: ‘Lun giñe inebe lan tumari o tani würi weiriei tun’ (Éfesuna 5:⁠33).

Idehatu oubafurugu lun ñein lan ugundani hadan familia anhein tíderagua tani weiriei agunfulirei liseriu lani buligasion. Igaburi le úarati luma lugundan Bungiu le íchugubarun würi kei “aban ídemuei lun lidan sun katei” (Agumesehani 2:18). Rutün san fe luagu buidu lan adundehani le lun habagari familia lun tíchugun oubafurugu inebesei lun tani weiriei úara tuguyame luma lau le desidírü lubéi íderaguateime ibihei le labuseerubei houn hafamilia?

Wügüriña hama würiña maríeitiña: “Inebelá maríei hun súngubei, lunti giñe hagunfulirun úmarigu [o maríeitiñu] hámagua lau úarani” (Ebüreu 13:​4).

Chóuruti, gañein lan habagari familia dan le hagunfulirun úmarigu hámagua lau úarani. Güringua lumuti agabarahani familia (Ariñawagúni 6:​27-29, 32). Ligíati, tíchugunbalin Bíbülia eweridihani sábiuti le: “Gundaaba tuma to úmaboun bamarieida danbei nibureingidibu [...], ka san uagu bádaragua bungua tumoun würi gagabarahatu?” (Ariñawagúni 5:​18-20).

Agübürigu: ‘Arufudaha humá buiti houn hirahüñü dan le ñüraügiña’ (Ariñawagúni 22:⁠6).

Dan le hatenirun agübürigu houn hasaanigu ígira hagía dan lun hadimurehan hama, chóuruti aba lan labuidurun ibagari lidan familia. Ladüga irichaü le, amisuraha tumutiñu Bíbülia agübürigu lun harufudahan lúrudu buiti houn hasaanigu ‘dandu húbiñe kei luagu héibuguniwagu, dan le harounrun luma dan le hásaarun’ (2 Lúrudu [Deuteronomio] 11:19). Erengatu giñe Bíbülia mosu lan hererehan agübürigu houn hasaanigu lun harufuduni hínsiñe hamá houn (Éfesuna 6:⁠4).

Isaanigu: “Isaanigu, [...] gaganbadi humá houn hagübürigu, lugundun ligía richabei” (Éfesuna 6:​1).

Inarüni nibureinti, luagu lidan lan ubóu magumadirunti le, mama súnwandan mérengun lan gaganbadiwa lan houn agübürigu. Gama lumoun, afiñetibu san sábiu lan ladügünua le lerengubei le adügübalin familia? Ligía asubudirubalin katimalan buitimaabei lun labihinua aban ibagari lau gundaü lidan familia. Ligíati, áfaaguaba lun gaganbadiban houn bagübürigu. Desidirübá lun badisedun luéi bandi óuchawaguni wuribati le larufudubei ubóu le (Ariñawagúni 1:​10-19).

Darime lawínwaduni kada aban lílana familia adundehani tani Bíbülia, buidubei ibagari lidan familia. Mámarügübei guentó gayara lan hagundaarun hufamilia lau lubuidun ibagari, ñeinbei giñe aban ibagari hagibugiñe lubá ámuñegü lidan iseri ubóu le füramase lubéi Bungiu (2 Féduru 3:13; Arufudúni [Apocalipsis] 21:​3,  4). Ligíati, hechu humá aturiahoun Bíbülia kei familia. Saragu miñonu familia lídangiñe sun Ubóu ariha hamaali huu lan tadundehan líburu El secreto de la felicidad familiar.