Aban eweridihani lüha meha lichugún

Mígirunbei Heowá lun hagadeiruni gürigia wuribatiña Paraísu. Lumadagu rügübaña awinwanda lidan. Kaba asusereda houn gürigia wuribatiña? Lun wasubudiruni óunabagülei, ariha waméi abahüdaguni inarüniti le lani Noé. Lóugiñe saragu milu irumu lúmagiñe lawinwandun Noé. Aban meha wügüri buiti Noé. Súnwandan hóuchati lau sun lere ladügüni lugundan Heowá. Ani ha híbiri aganóutiña Ubouagu wuribati meha hóuserun. Ligía lariñagunbei Heowá lun Noé lanügüba lan aban gunran lun lagumuchaguagüdüniña gürigia wuribatiña. Óunaha lumuti giñe adüga aban árüka móunwen láamuga móunwen hagíame lufamilia danme le lachülürün Gunran (Agumesehani 6:9-18).

Noé hau lufamilia adügübanu árüka. Awisaha lumutiñu Noé híbiri gürigia luagu anite lan Gunran ani úati ni aban aganbuti. Aba hasigirun óusera lau luriban. Dan le lagumuchunbanun Noé árüka aba lebelaagüdüniñu animaalugu tidoun, lárigiñe aba lebelurun hau lufamilia. Ábati lanügün Heowá aban óunwenbu durumandei o huya. Bián-wein weyu luma bián-wein áriebu lau huya áhuya, aba labuinchun Ubóu lau duna (Agumesehani 7:7-12).

Féridi hamuti gürigia ha wuribabaña habagari, ani Noé hama lufamilia sefutiña. Tóunigi lumutiñu Heowá lidan Gunran barǘ laña lidoun aban Ubóu harumati luéi wuribani (Agumesehani 7:22, 23). Terenga Bíbülia lachülürayaba lan dan lun lagumuchaguagüdüniñu Heowá ha mabuseerunbaña hadügüni le úaraguabei. Magumuchaguagüdün lubaña gürigia ha buidubaña. Hawinwanduba lun súnwandan lidan Paraísu Ubouagu (2 Féduru 2:5, 6, 9).

Uguñe weyu, gíbetiñu gürigia adügütiñu katei wuribati. Buin liña Ubóu lau turóbuli. Óunaha lumutiña Heowá ha Gefentiña luagu bandi wéiyaasu lun heweridihaniñu gürigia, ani hibe-agei mabuseeruntiña haganbuni lererun Heowá. Mabuseeruntiñu hasansiruni habagari ni lun lariñaguni Bungiu houn le buidubei lumoun le wuribabei. Kaba asusereda houn gürigia ha? Hasansiruba funa san ámuñegü? Besafu hádangiñe maweiyasuntiñu asansira. Yarafaali weyu lun hagünrinchawagun o lagumuchunua hau gürigia wuribatiñu lun súnwandan (Sálumu 92:7).

Magumuchaguagüdünwabei Ubóu; ladügüba ábame paraísu. Ha adügütiñu lumadagume Bungiu hawinwanduba lun súnwandan lidan Paraísu Ubouagu (Ariñawagúni 2:21).