Yarafaali dan lun lagumuchun asufuriruni
Somu dan lidan hibagari, gayarati alügüdagua humá hungua: “Ka san uagu anihein lubéi bandi asufuriruni ubouagu?”. Barühaña gürigia garaüwarügütiñu saragu milu irumu áfaga ladüga lanarime burí wuribu, gudemei, lamiselu, sun luwuyeri wuribani, marichaü, sandi burí luma óunweni. Hanarimetimati asufuriruni lidan san irumu le sügühalibei, luéi amu dan. Lachülürüba funa san dan lun lagumuchun sun le?
Anha, murusunrügaali dan lun lagumuchun, ruti óunabagülei le gurasu. Füramasetu Bíbülia, to Lererun Bungiu: “Málühaña ánhaña ua wuribatiña, [...]. Ánhaña ha ǘnabubei hanaagun houngua, hagíaba laburiña múa, habagariduba lidan darangilaü le dayarüti”. Luagu átiri dan? Bíbülia guánarügü óunabuboun: “Galangantehabei gürigia buítiña múa, haganóuba giñe lidan súnwandan” (Sálumu 37:10, 11, 29).
Danme le lagumuchaguagüdüni Bungiu wuribani luma asufuriruni, ábame ladügüni Ubóu paraísume ñeinba lubéi habagarida gürigia lau ugundani lun súnwandan luma lubuidun úragu. Erenga tumuti Bíbülia le lunbei ladügüni Bungiu “laragahabei sun háguira; úaalime óunweni ni ayahuni ni íruni ni igarigu” (Arufudúni [Apocalipsis] 21:4).
Lidan iseri ubóu ligía, íbini habagari bandi gürigia ha hilaañabaña lagiribudawagüdüba houn lun giñe hagundaarun lau burí abinirúni ligía. Füramasetu Bíbülia: “Lásaaragüdübaña lan hilaaña, dandu ha buídubaña kei ha wuribabaña” (Adügaü [Hechos] 24:15). Ligíati, gayara lubéi lerenguni Hesukrístu dimurei le lun aban gürigia wuribati le asakürihaali ani afiñeli luagu: “Numabadibu lidan paraísu” (Lúkasi 23:43, Traducción del Nuevo Mundo).
Ka uagu latatirunbei asufuriruni?
Anhein lisuuni lubéi meha Bungiu lun hagundaarun gürigia lau aban lubuidun ibagari ámuñegü, ka uagu lígira lun ñein lan asufuriruni? Ka giñe uagu lígira lun lasigirun luagu bandi dan?
Dan le ladügünbaliñu Bungiu Adán tuma Ewa, adüga lumutiñu lau aban úgubu luma aban saminaü mafigounti. Rulumutiñu giñe lidoun aban fuluri-agei le paraísu ani ru ligía aban wadagímanu houn le aubei hagundaara. Erengatu Bíbülia: “Aba larihin Bungiu buidu lan sun le ladügübei” (Agumesehani [Génesis] 1:31). Lun hamuga gaganbadi hamá meha lun le adügübaliñu, mafigounbaña yebe harahüñü. Gama lumoun adügüwati hamuga sun Ubóu paraísume ñeinba lubéi yebe hawinwanda gürigia lun súnwandan lau ugundani luma darangilaü.
Dan le ladügünbaliñu Bungiu Adán tuma Ewa bunalumuti ubafu hadan lun gayara lan desidírü hamani hagía guánarügü le lunbei hadügüni, rulumuti ubafu ligía houn keisi aban idewesei. Mitarantiñu meha kei aban máhina le setiwali sun lánhingichun. Gama lumoun, lun hasigirun abagarida lau ugundani mosu yebe meha hayusuruni ubafu le líchugubei houn lun desidírü hamá lau igaburi le richabei: lun gaganbadi hamá lun lilurudun Bungiu. Bungiu meme erengubei: “Au Aburemeibei le Bubungiute; arufudaha numuti le buídubei bun, adundeha numutibu luégiñe üma le lunbei bafalaruni” (Isaíasi 48:17). Luriban layusurun ubafu lun desidirüa lan barüti óunwenbu burí turóbuli, ladüga madügǘntiñu gürigia lun hawinwandun dise luéi lagumadihan Bungiu. Arufudatu Bíbülia: “Mama wügüri laburemebei lémeri, siñalumuti giñe wügüri le éibugubei lupasun ásururagüda” (Heremíasi 10:23, Reina-Valera Actualizada, 1989).
Híruti, afiñe hamá furumiñetiñu wagübürigu luagu gayara lan hafuridun lábugiñegiñe lagumadihan Bungiu ani hasigiramemeba lan lau gundaü. Féridi hamuti lídehan Bungiu dan le hamahadun lun larúeihan, ladüga lira aba giñe gafigoun hamá. Ítara liña hatatirun edebilida, aba hagumuchun aweiyadeina aba giñe hóunwegun. Kei harahüñü wabéi, galagante wamuti giñe figóu luma óunweni (Rómana 5:12).
Le tima lisúdini katei: líricha Bungiu lun larúeihan
Ka san uagu magumuchaguagüdün lubaniñu Bungiu Adán tuma Ewa ábaya hamuga latatirun lau amu wügüri tuma amu würi? Ladüga lebedaawagun lun líricha lun larúeihan. Nihán káteibei: ka garichabei lun larúeihan, ani ka arúeihabei kei le lubeibei? Ani, buitimaabei funa san lidin lun wügüri anhein adiseda luéi lagumadihan Bungiu? Lidan líchugun dan lun hasigiruni gürigia garaüwarügütiñu üma le habuseerubei lau libürei, arufudalumuti sunsuinagubei anhein buitimaabei lubéi houn lun herederun lábugiñe lagumadihan Bungiu o hagía guánarügü lan agumadiragua houngua. Dan le ígirubei mosu buídurügü lan limigife lun houchun sun luwuyeri arúeihani, luma burí amu luwuyeri aransehani le lani wügüri kei burí le ahuudubei houn sun lílana ageiraü, gumadi le lánina relihión luma le lánina lahandilihoun lirisin ageiraü sin ladundehan Bungiu.
Kagía lanibei le resultóu? Saragu milu irumu le sügühalibei arufudalumuti lanarimeburi wuribani le suserelibei. Ani sígulu le asügürübei, ligía hanarimetimabei, ladüga miñonu ibagari le eferidirubei lidan Holocausto [hafaraguniñu Nazis Huríu lidan libiaman wuribu wéiriti] hama san miñonu gürigia ha óunwegubaña ladüga burí wuribu. Ani guenlé, kamaniti anarimeni luma wuribani. Hanarimetimaahali hayusurun gürigia düroga guenlé. Meredeti laburuchagun luriban sandi le ibihubei lídangiñe agaferuni. Hilatiñu saragu miñonu gürigia sagü irumu ladüga ilamaü luma sandi. Lidan sun fulasu lagumuchaguña buiti le arufudahoubei lidan familia luma laruma igaburi. Furanguti úati lan ni aban arúeihani hani gürigia lun gayara lan laransehani turóbuli burí le. Úagiili ni aban gayarati ladügün ni kata lun lagidaruni aweiyaduni, sandi luma óunweni.
Katei le gádanbaniñu gürigia lidan wadaani ítara liña kei le aubei terengei Bíbülia. Arufuda tumuti Lererun Bungiu wawínwanduña lan lidan “lagumuhóun dan” lani ubóu le, ñeinba lubéi “liábinburiba lan weyu hénrenguti”. Ani eweridihani le lagunfuliruña kei le aubei terengei Bíbülia: “Ha wuribabaña hama ha geyeehadibaña, haribadatimaba” (2 Timotéu 3:1-5, 13).
Yarafaali dan lun lagumuchun asufuriruni
Sun katei le asuseredubei arufudati luagu yarafaali lan dan lun lagumuchunua lau lanarime luriban hálugun gürigia hawinwandun dise luéi lagumadihan Bungiu. Furanguti larufudunua lau maweiyasunbei lan larúeihan wügüri dise luéi Bungiu awansera, ani larúeihanrügübei lan Bungiu gayara líchugun darangilaü, ugundani, atuadi buiti luma ibagari magumuchaditi. Ítarati, dan le igiralaalibei Heowá lun ñein lan wuribani luma asufuriruni gumumemeli. Yarafaali dan lun laransehani Bungiu katei hadan gürigia ya ubouagu ani gumuguagüdaleime katei wuribati ubouagugiñe sunsuinagubei.
Aban profesía tídangiñeti Bíbülia erengati: “Lídanme lidaani harúeihan urúeigu ha, [urúeigu ha guenlébaña] ladügüba Bungiu le siélubei aban arúeihani [sielu] le siñabei lagünrinchaguni [...] ni aban néchani, günringuarügü lubéi arúeihani ligía sun líbiri arúeihani sunsuinagubei [arúeihani burí le guenlébei], ábame ladurarun lun súnwandan” (Danieli 2:44). Larumadahani Heowá liricha lun larúeihan —lau Arúeihani le siélubei ligía arufudahani le súdinitimaabei tídangiñe Bíbülia. Erengati Hesusu aban katei súdinitimaati lídangiñe liseini “lagumuhóun dan” lau dimurei burí le: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Matéu 24:14).
Danme le lagumuchun ubóu, kátaña san lunbaña hesefurun? Óunabatu Bíbülia: “Ladüga ha abagaridubaña lidan ísuruni sunsuinagubei, habagariduba súnwandan ubouagu; ánhaña ha salufuribaña hama ha múaranbaña, hahulúba, bugawa hagíame ubouagugiñe” (Ariñawagúni [Proverbios] 2:21, 22). Gürigia ha úaraguabaña hagía afunrendeirubani katei lan lugundanbei Heowá ani adüga hamuti. Erengati Hesukrístu: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei” (Huan 17:3). Anha, “ubóu, agumucheina liña [...] ánheinti le adügüti lugundan Bungiu, labagariduba lun sun dan” (1 Huan 2:17).