SEKSIÓUN 1
Ledewehan Bungiu aban paraísu
Aba ladügüni Bungiu sielu ubóu luma ibagari ubouagu; adügati aban wügüri tuma aban würi mafigountiña, aba líchuguniña lidan aban fuluri-agei ru ligía lúrudu burí houn
“DAN le lagumeserunbei sun katei, aba ladügüni Bungiu sielu luma ubóu.” (Agumesehani 1:1.) Ariñawagúati anihán lan dimurei lánina ebelaagülei le subudiwatimabei. Lau dimurei fínuti ani sensiyuti le, tarufudei Bíbülia gürigia méinitimati le uágubei tayanuha: Heowá, Bungiu suntigabafu, Le adügübalin sun katei íbini ubóu. Lárigiñe, afuranguagüdatu aba lan laransehani Bungiu Ubóu adügaléi sun katei buíduburiti le ligibuagubei lidan fiú dan migifeti le unbei tagúara Bíbülia weyu.
Le súdinitimabei lídangiñe sun le ladügübei Bungiu ubouagu, gürigia. Lídangiñe kaliki le múarugubei ladügei furumiñeti wügüri. Lenege guánarügü ladügei, mini lan le, gayara lan láyeihani línsiñehabu, lichú lau luma le líbiri ligaburi Bungiu. Adán liña lagúarun lun, aba líchuguni lidoun aban paraísu le unbei lagúara Edén. Bungiu giñe adügübalin fuluri-agei ligía ani gíbetu tídibu wewe ñein to semeburitu tin.
Aban weyu, desidírüti Bungiu ourali lan lun gapaanan lan wügüri. Ábati lasagarun aban lídangiñe luruhure Adán, aba ladügünu Ewa aba líchugunu lun, lun lánime weiriou. Wéiriti lugundan Adán darí lun ladügün aban poema ñein lubéi lariñaga: “Anati to, lídangiñetu nǘgürügü luma nabu!”. Ariñagatu Bíbülia: “Ligía lígirubei lubéi wügüri lúguchi tuma lúguchu, lun laganóun tuma lúmari, ábame hayabin lun ítara haba lan kei ábanrügü gürigia” (Agumesehani 2:22-24; 3:20).
Mosu meha hagunfulirun Adán tuma Ewa biama lilurudun Bungiu. Furumiñe, mosu meha hóunigiruni Ubóu bunagua haméi ani garahüñügua hagíame. Libiaman, anuhein meha aban tídibu wewe to siñati héiginu lidan fuluri-agei: “wewe to lánina lasubudirúniwa le buídubei lumoun le wuribabei” (Agumesehani 2:17). Kábati buga asusereda ánhaña maganbadi? Hóunwegun. Le linarün katei, aban meha chansi lira lun harufuduni lun Bungiu anha hamá lun lilurudun, hínsiñe lan houn ani teinki hamani. Ígiraguati resun lun gaganbadi hamá lun. Úati meha figóu hawagu, ariñagatu Bíbülia: “Aba larihin Bungiu luagu buidu lan sun le ladügübei” (Agumesehani 1:31).
(Lídangiñeti Agumesehani kapítulu 1 luma 2.)