Móunweguntiña lidan guran

EIBU aganwoundeina hamá gürigia ubouagu, aba giñe laganwoundun figóu luma wuribani. Adimurehati Enoku lagumuchuba lan Bungiu hau sun wuribatiña, háfuga ligíarügüñein meha lubuein Bungiu ubouagu. Gama lumoun, ganwounrügüti wuribani. Ebedaaguatiña fiú ánheligu lun Heowá, ígira hamuti halugaarun sielu, aba hasaliragun gürigiame aba hamarieidun hama sun würiña ha habusenrun. Lídangiñe maríei mama naturáliti ligía, nasiruatiña fiú hígandei ha hanarimeti here sügǘ hau gürigia, nefilin lagúarun houn lidan Ebüréu, aba habuinchagüdüni ubóu lau anarimeni. Wéiriti igarigu le lasandirubei Bungiu dan le larihini gádeiha lan ubóu le ladügübei.

Lárigiñe lounwen Enoku, ñeinñein aban wügüri buiti: Noé meha líribei. Dandu ligía kei lufamilia áfaaguatiña hagundaaragüdüni Bungiu. Aban weyu, desidírüti Heowá lanügün aban guran lun lagumuchun hau wuribatiña. Ani mabusenrunti lun lounwen Noé ni animaalugu. Ligía lariñagunbei lun, lun ladügün aban árüka o aban gafu wéiritu migifeguarügütu lun laramudagun tidan hau lufamilia, belugüda hagíame sun hawuyeri animaalu ñeinhin. Gaganbaditi Noé, sügüti kéiburi bián-wein o dimi-san irumu adügoun árüka, ani ‘apurichihati giñe houn gafigountiña’ (2 Féduru 2:5). Wisá lumutiña gürigia luagu anite lan Guran, ani mebereseguntiña lau. Aba lachülürün dan lun lebelurun Noé hama lufamilia tidoun árüka hama animaalugu. Ábati ladouruni Bungiu bena, aba lagumeserun huya áhuya.

Hanarimeti láhuyun huya luagu 40 weyu luma 40 áriebu, aba labuinchun sun Ubóu. Gumuguatiña sun wuribatiña. Lau lásügürün dan, aba ararireina lan duna, aba tadagarun árüka ligibuagu aban wübü. Sügühali aban irumu láfuridunbei Noé hama lufamilia tídangiñe árüka. Le leteingiradi, aba ladagaragüdün aban idewesei lun Heowá. Ábati lachoururuni Bungiu houn tau aban heremuru magumuchundigiaali lan lau ibagari ubouagu lau aban guran. Ságüme harihinu gürigia heremuru haritagubei füramasei ligía.

Lárigiñe Guran, ruti Bungiu iseri adundehani. Ruti üma lun héigini hágürügü animaalugu, gama lumoun, wéridi lumutiña luéi heigin hitaü. Ariñagati giñe lun hafanreinragun gürigia ligibuagu sun Ubóu. Gama lumoun, gíbetiña maganbaditiña, aba hóundaragun lidan aban uburugu aba hadügün aban wáyelesi lábugiñe lagumadihan Nimüródu. Ani günringua lumuti Bungiu le hasaminarubei hadügün. Ida? Adügati lun hadimurehan lílana uburugu —le meha gíribei Babeli ñéingiñe Babilónia— ámuñegueinarügü iñeñei. Kei úaali lubéi gúnfurandagua hamá houngua, aba hafanreinragun.

(Lídangiñeti Agumesehani kapítulu 6 darí 11 luma Húdasi 14 luma 15.)