Lesefuruniña Bungiu ísüraelina

LÁRIGIÑE saragu irumu lau lubuidun dan Ehiptu, aba hagibedagun ísüraelina. Ábati lagumeserun amu faraón agumadiha, aban urúei furundeti, ibidiñeti Hosé lun. Kei larihin gíbeguaaña lan ísüraelina, adügati lun idamuni hamá luma lun hañaradaguagüdüniwa wügüriña irahüñü ha sun liña hágurahoun lidan duna Nilu. Anuheinti aban würi ísüraelina ganigitu, aba tíchuguni tiráü lidoun aban faniñe aba taramuduni lidan góunwere-agei. Aba tadeiruni liráü faraón aba tíchugun Moisesi lírime aba tagüriaruni haganagua lufamilia Urúei.

Dan le 40 lubéi irumu lau Moisesi beluti lidoun turóbuli ladüga lageindagun luma aban ábuti Ehiptuna luagu lufulesein aban ísüraelina, aba lanurahan lidoun aban fulasu díseti. Dan le 80 irumu lau, aba lariñagun Bungiu lun, lun lagiribudun Ehiptun ariñaga lun faraón lun lígiragüdüniña ísüraelina.

Kei maha lubéi faraón, aba lóunahan Bungiu diisi íñanaü Ehiptun. Lubaragiñe kada aban, ariñaga lumuti yebe Moisesi lun Urúei le lunbei ladügüni lun masuseredun lan. Ani súnwandan lóunabun lau íñuguni adüga ligía bula lau Moisesi luma lau Heowá. Lidan lidiisin íñanaü, óunahati Heowá aban ánheli lun láfaraguniña sun ígiramaü Ehiptuna. Hábiñounrügüñein familia ha gaganbadibaña lun Heowá mebelurun lan ánheli, ladüga háhurudaguni lumarukun habenari lau lita mudún le ederegerúbei lidan sákürifisiu. Lun haritaguni sügǘ ligía, aba hagumeserun ísüraelina efeduhei Luéyuri Esefuruni, aban wéiyaasu luagu irumu.

Lárigiñe leferidiruni faraón lígirama, aba lariñagun lun Moisesi luma houn ísüraelina lun háfuridun Ehiptugiñe. Aba haranseruni áfuriduni ligía lau lóufudagun. Gama lumoun, sánsiguati lisaminan faraón, aba léibaahaniña hau lisudaranigu tuma burí likarün lánina wuribu. Dan le hachülürün laru barana Funati, genegeti yebe mesefuragülehaña lan ísüraelina. Aba lafanreinraguni Heowá barana lun hásügürün luéigiñe sagoun mábeiti. Dan le hebelurun ehiptuna hárigi, aba ladouraguni Bungiu barana aba lañaradagun faraón hama lisudaranigu.

Dan lárigiñe, redeitiña ísüraelina lurugabu wübü Sinaí, ñein ladüga Heowá aban daradu hama. Yusu lumuti Moisesi lun líchugun lúrudu houn le lunbei ladundehaniña tóunigi lañame lidan habagari. Seriwirügaaña ligía lun Bungiu lau úaraguni luma gaganbadi, ñeinbei hama ani layusurubaña lun labinirun amu burí néchani.

Gama lumoun, hibe-agei arufudatiña mafiñen hamá luagu. Ligía lígirunbaliña éibugañahadügü lidan fulasu mageirawati luagu 40 irumu. Ábati líridun Moisesi aban ísüraelina úaraguati gíriti Hosué leweñeguame. Lagumuhóun, aba hebelurun ísüraelina lidoun fulasu le füramase lubéi Bungiu lun Abüraámü.

(Lídangiñeti Áfuriduni, Fádirigu, 1 Lúrudu, 2 Lúrudu, Sálumu 136:10-15 luma Adügaü 7:17-36.)