Hapurichihan apostolugu lau ganigi

DIISI weyu lárigiñe lamudeirun Hesusu sielun, lidan hafedun huríu le gíribei Pentekosutesi lidan irumu 33, aba hóundaragun kéiburi 120 disipulugu tidan aban muna Herusalén. Sódini, aba laganbún kamá hamuga láfuragun aban garabali héreti, aba hagumeserun disipulugu adimureha lidan iñeñein le ibidiñeti houn. Ka asuseredubei? Líchuguñein Bungiu lani sífiri sandu houn.

Buin liña uburugu hau terencha ha ñǘbuinbaña efeduha. Sun gürigia, aba taweiridun hanigi dan le harihiniñu lani Hesusu disipulugu adimureha hama lidan hererun guánarügü. Lun lafuranguagüdüni le meha asuseredubei aba ladimurehan Féduru luagu le lariñagubei profeta Hoeli, lóunahabei lan Bungiu lani sífiri hawagun lubueingu ani líchuguba lan ubafu houn (Hoeli 2:28, 29). Milaguru burí le arufudati furangu luagu damuriguaü lan le hani kristiánugu labinirubei Bungiu mama ísüraelina. Ligíati lúmagiñe dan ligía, ha busentiña heseriwidun lun Bungiu mosu hadügün kristiánugume.

Ábati hagumeserun láganiñu Kristu éibaahaña disipulugu. Aba hádaruniña furisunrugun, gama lumoun, aba liabin aban ánheli áriebu aba lalíbüreruniña ariñaga ligía houn lun hasigirun apurichiha. Kei larugadun, aba hebelurun tidoun ténpulu aba hagumeserun ayanuha luagu Hesusu. Lau lanarime igañi aba hariñagun alidihatiña relihión houn lun hígiruni hapurichihan. Ábati hóunabun apostolugu lau ganigi: “Lunti waganbuni Bungiu lun wadügüni le lariñagubei lubaragiñe le hariñagubei wügüriña” (Adügaü 5:28, 29).

Aba laganwoundun éibaahouni. Aba hariñagun fiú huríu anaba lumuti lan disipulu Esütéban Bungiu ani aba hachamuragun dübü luagun darí lounwen. Hadan ha arihibalin lafarún Esütéban ñeinñein aban nibureinti gíriti Saulu le Tárüsuna. Lárigiñe sügǘ le aba lidin Damasüku lun ladaüragüdüniña sun kristiánugu ha ladarirun. Lidan léibuguniwagu, aba liabin aban leiti siélugiñe luagun, aba marihinhali lan. Ábati lariñagun aba umalali siélugiñe: “Saulu, Saulu, ka san uagu béibaahana?” Ábati lálügüdahan: “Kátabu san Nabureme?” Aba lariñagun umalali ligía: “Hesusu au” (Adügaü 9:3-5).

Ǘrüwa weyu lárigiñe, aba lóunahan Hesusu aban disipulu gíriti Ananíasi lunya gayara lan larihin Saulu. Aba labadiseirun Saulu aba lagumeserun apurichiha lau ubebeni. Lau lásügürün dan, aba lasubudirúniwa kei apostolu Pábulu, aban kristiánu le mabuchati luagu apurichiha.

Furumiñe, hóunrügüñein meha huríu hama samariana hapurichiha disipulugu luagu Larúeihan Bungiu. Gama lumoun, luagu aban weyu aba larufudagun aban ánheli lungua lun Korunéliu, hábuti súdaragu rómana le afiñebei luagu Bungiu, aba lóunahani agúara lun apostolu Féduru. Aba liabin úara hama amu, apurichiha lun hábuti súdara le, luma houn tílana luban. Lidan anihán lan apostolu ayanuha, aba heresibirun gürigia afiñetiña hagía sífiri sandu, aba lariñagun Féduru lun lan habadiseirun lidan liri Hesusu. Lúmagiñe oura ligía, gachansintiña lílana sun néchani lun hibihini ibagari magumuchaditi. Le linarün katei, lapurichihóuba uganu buiti lidan sun ubóu.

(Lídangiñeti Adügaü 1:1–11:21.)