Adundehani luagu afiñeni, usa luma ínsiñeni

LÍBIRIGU meha Hesusu Santiagu luma Húdasi ladüga tirahüñü lan María, ánheinti Féduru luma Huan lani meha apostolugu. Sedüñoun gárada habürüdün lidan Güriegu, kada gárada barü tumuti liri le abürüdübarun. Bürüwatu lun tíderaguniña kristiánugu lun úaragua hamá luma lun hakipuruni harihin luagun Larúeihan Bungiu.

Larufudún afiñeni. Úati buídurügü lan wariñagun afiñe wamá, mosu warufuduni lau katei le wadügübei. Ariñagati Santiagu: “Hilañu liña giñe hafiñen anhein marufudun humá lau katei buiti le hadügübei” (Santiagu 2:26). Le araramubei lun óuchawaguni lau afiñeni ábatima léredun. Gayarati giñe lamuriahan lichú aau luma Bungiu lau ichouruni luagu líchugubei lan lun. Anhein úaragua lun Heowá lagundaaruba lau (Santiagu 1:2-6, 12). Súnwandan líderaguniña Bungiu ha arufudubaña úaragua hamá lun. Ariñagati Santiagu: “Yarafa humá lun Bungiu, ábame giñe layarafadun hun” (Santiagu 4:8).

Mosu hederebudagüdüni kristiánugu hafiñen lun hamahadun lun óuchawaguni luma houn hagübüri umadagu. Húdasi le meha awinwandubei lidan aban fulasu le ñein lubéi saragu magíaguni aba lariñagun houn lun “háfaagun luagu afiñeni” (Húdasi 3).

Lakipurún laruman usa. Agurabati Heowá lun sandu hamá, haruma hagíame lubueingu lidan sun katei. Abürühati Féduru: “Abagarida humá aban ibagari sánduti le gumuti [...]. Tariñahare Lererun Bungiu: ‘Sandu humá, lugundun au [Heowá], sándutina’” (1 Féduru 1:15, 16). Ligíati, gayarati háyeihani lani Kristu hénpulu, según lariñagun apostolu Pábulu ruti “aban hénpulu hun lun hafalaruni” (1 Féduru 2:21). Íbini anihein lan dan hérengu lan gaganbadi humá lun lilurudun Bungiu, le súdinibei ‘haruma tan hanigi’ súnwandan (1 Féduru 3:16, 17). Ariñagati Féduru saragu wéiyaasu súdini lan hakipurun laruman usa ani arufuda huméime lau le hadügübei, hínsiñe lan Bungiu hun lidan hagurabuni lachülürün Luéyuri Aguseruni luma iseri ubóu le füramasewabei, “úaraguabei sun katei ñein” (2 Féduru 3:11-13).

Larufudúniwa ínsiñeni. “Ínsiñeni Bungiu” liña Huan. Arufuda lumuti Heowá weiri lan wínsiñe lun lau lóunahani Liráü lun lóunwen “lébuname ferudunawa lan wafigoun”. Ínchaha lumutiwa línsiñehabu Bungiu adüga somu katei. Aba lafuranguagüdüni Huan: “Anhein hínsiñeediwa lubéi lun Bungiu ítara, lunti giñe hínsiñegua wamá wámagua” (1 Huan 4:8-11). Dan le weresibiruniña íbirigu buidu warufuduñein hínsiñe hamá woun (3 Huan 5-8).

Ida liña harufuduni kristiánugu hínsiñe lan Heowá houn? Óunabati Huan: “Ladügǘniwa le lubeibei Bungiu, ligía ínsiñehabunibei lun; ani ménrengunti lagunfulirúniwa lugumadin” (1 Huan 5:3; 2 Huan 6). Ha gaganbadibaña lun Bungiu subuditi houn gayara lan herederun lidan Línsiñehabu agurabei “ibagari magumuchaditi” (Húdasi 21).

(Lídangiñeti Santiagu, 1 luma 2 Féduru, 1, 2 luma 3 Huan luma Húdasi.)