LEKSIÓUN 15

Ka hawadigimaribei wéiyaaña lidan afiñeni lidan damuriguaü?

Aban wéiyaali lidan afiñeni adimureha hama fiu lílana damuriguaü le ñein lubéi leseriwida — Finlandia

Aban wéiyaali lidan afiñeni arufudaha lidan damuriguaü — Arufudaha

Wéiyaaña lidan afiñeni íchiga dǘgüdaguaü houn lílana damuriguaü le ñein lubéi heseriwida — Abisidahaña íbirigu

Aban wéiyaali lidan afiñeni apurichiha — Apurichiha

Lidan wadamuridagun úatiña fádirigu o ábutigu ha resibitiña seinsu. Lubaragiñe lira, kei meha ladügǘniwa lidan furumiñeti damuriguaü kristiánu, iridúatiña wügüriña ha derebuguhali hafiñen lun hóunigiruniña “tánigu liligilisin Bungiu [o lílana lidamurin Bungiu, NM]” (Adügaü 20:28). Wéiyaaña lidan afiñeni ha, wügüriña ha buiti hamadagua luma Heowá, hagía adundehabaliña lílana damuriguaü, ani adüga hamuti ‘mama ladüga hafosuruña lan; adüga hamuti ladüga busén hamá heseriwidun lun Bungiu, mama ladüga línsiñe seinsu houn’ (1 Féduru 5:1-3). Ka hadügübei luagu wafulesein?

Góunigi hamutiwa. Adundeha hamutiña wéiyaaña lidan afiñeni lílana damuriguaü ani tóunigi hamutiña luéi heferidiruni hamadagua luma Bungiu. Kei subudi habalin Bungiu lan íchugubalin kárugu súdiniti le houn, míchugun hamuti halurudun, ídeharügütiña lun buidu lan lidin woun ani gunda wagía (2 Korintuna 1:24). Ítara kei lóunigiruni hóuniri mudún kada aban hádangiñe lilügüniña mudún, áfaaguatiña wéiyaaña lidan afiñeni lun hasubudiruniña kada aban hádangiñe lumutuniña Bungiu (Ariñawagúni 27:23).

Arufudahatiña woun lun wadügüni lugundan Bungiu. Dimaasu luagu dimaasu, alidiha hamuti wéiyaaña lidan afiñeni adamuridaguni le adügǘbei lun lederebudagüdüni wafiñen (Adügaü 15:32). Íbirigu ha, alidiha hamuti apurichihani, apurichihatiña giñe wama ani ru hagía adundehani woun luagu ámuñegueinarügü katei lidan wani ministeriu.

Rútiña dǘgüdaguaü lun kada aban wádangiñe. Lun híderaguniwa akipurei wamadagua luma Bungiu, ñǘdüntiña wéiyaaña lidan afiñeni abisidahawa wábiñe ayanuha hagía wama tidan Luban Wadamuridagun. Yusu hamutu Lererun Bungiu lun híchugun ídemuei woun luma gurasu (Santiagu 5:14, 15).

Amu luéi wadagimanu le hadügübei lidan damuriguaü, hibe-agei wéiyaaña lidan afiñeni nadagimeintiña giñe lun gayara lan híchuguni hemegeirun hafamilian houn ani tóunigi hamaña. Yuuti lun inebe hamá íbirigu ha woun lugundun hanarimeti hawadigimaridun (1 Tesalónikana 5:12, 13).