Ida luba wídehan lidan tounigirún Luban Wadamuridagun?

Sun Luban Hadamuridagun gefentiña luagu Heowá barǘ tumuti liri Bungiu le sándubei, ligía lunti lubéi wakipurunu harumañu ani lun buidu lan taríawagun. Aban óunwenbu chansi le lúmagiñe Bungiu, aban fánreinti lídangiñe áhuduraguni sagüráuti le wíchugubei lun Heowá, ani sun wagía gayarati wídehan.

Ídeha wamá lidan arumadahani lárigiñe adamuridaguni. Lárigiñe adamuridaguni, aba hídehan lílana damuriguaü lidan tarumadahóun Luban Wadamuridagun; ani aban wéiyaasu luagu dimaasu aba hadügün aban arumadahani le buítimati. Aban wéiyaali lidan afiñeni o aban ídehati lidan damuriguaü alidihabalin wadagimanu le, libe-agei dan sigí hamuti adundehani le tídanbei lísüta lánina arumadahani: abuidaha, láfuruhoun kaliki luéi haláü; tachibún kumú; larumadahóun funedera tuma isubusei; lachagarún ifei, luma larumadahóun ani aransehóua ligía bóugudi. Aban wéiyaasu luagu irumu adügǘwati aransehani lun ladügǘn aban arumadahani le wéiritimati. Dan le wíchugun somu wadagimanu houn irahüñü, arufudahatiwa houn lun inebe tan Luban Wadamuridagun houn (Apurichihati 5:1).

Ídeha wamá lidan taransehóun. Sagü irumu áluaha hamuti íbirigu buidu sun mégeiti le tuágubei Luban Wadamuridagun dandu bóugudigiñe kei múnadagiñe lun harihini ka lan katei mégeibei laranserún lun buíduñu tan muna lun giñe madügǘn lan aban gastu wéiritimati ámuñegü (2 Krónikasi 24:13; 34:10). Dan le harumañu tan Luban Wadamuridagun ani buidu ligía taríawagun, gadünamatu lun wáhuduragun lun Bungiu. Ánhawa ídeha lidan taransehóun, warufudubei súdini tan woun ani weiri lan línsiñe Heowá woun (Sálumu 122:1). Wadügüba giñe lun buidu lan hayanuhan gürigia luagu wóundarun (2 Korintuna 6:3).

• Ka uagu mosu lubéi wóunigirunu Luban Wadamuridagun?

• Ka burí wadagimanu adügǘbei lun harumañu lan takipurún Luban Wadamuridagun?