LEKSIÓUN 15
Ka uagu lunti lubéi hasigirun aturiahoun Bíbülia?
1. Ida luba líderagunün hasigirun aturiahoun Bíbülia?
Chóuruti adügaali lan furendei le ibiha humaalibei tídangiñe Bíbülia lun línsiñedun Heowá hun. Guentó, mosu hasigirun aganwoundagüdei ínsiñeni le (1 Féduru 2:2). Lun hakipuruni hemenigin luagu ibagari magumuchaditi mosu hasigirun yarafa lun Heowá lau haturiahanu Lererun. Aliiha huméi Huan 17:3 luma Húdasi 21.
Éibume laganwoundun hisubudin luagu Bungiu, lederebuguduba hafiñen ani ladügüba afiñeni le lun gayara lan hagundaaragüdüni Bungiu (Ebüréu 11:1, 6). Ínchaha lumutiwa wafiñen lun wasakürihan luma lun wadügün asansiruni lidan wabagari. Aliiha huméi Adügaü 3:19.
2. Ida luba gayara lan híderagun amu gürigia?
Gayarati hagundaarun lau aban lubuidun umadaguaü luma Heowá
Háfuga busenbadün habahüdahan houn amu gürigia luagu le furendei humaalibei, lugundun sun wagía hínsiñeti woun wíchugun ñunsu buiti. Éibume hawanserun lidan haturiahanu Bíbülia, hafurendeiruba ayusuroun lun hayanuhan luagu Heowá luma luagu uganu buiti. Aliiha huméi Rómana 10:13-15.
Gayarati hagumeserun ayanuha houn hiduheñu hama humadagu, gama lumoun lunti hadügüni lau ínsiñeni luma inebesei. Mariñaga humá houn charati lan hafiñen, ayanuharügü humá houn luagu lani Bungiu füramasei. Mabulieida huméi wéiritima lan lani le hadügübei efekütu sügǘ lau le hariñagubei. Aliiha huméi 2 Timotéu 2:24, 25.
3. Ka luwuyeri umadaguaü gayarabei hadügüni luma Bungiu?
Ladügüba taturiahóun Bíbülia lun laganwoundun hafiñen luma lun hadügün aban umadaguaü buiti luma Heowá. Gayarati aban humá hádangiñe lílana lufamilian Bungiu. Aliiha huméi 2 Korintuna 6:18.
4. Kaba íderaguaün lun hasigirun awansera?
Mígira huméi haturiahanu Lererun Bungiu (Ebüréu 5:13, 14). Amuriaha humá luma aban gefenti luagu Heowá lun líchugun aturiahani hun tau líburu Kátima san tarufudahabei Bíbülia? Éibume hafurendeirun, gúndaatimabei hibagari. Aliiha huméi Sálumu 1:1-3 luma 73:27, 28.
Uganu buiti le tídanbei Bíbülia lúmagiñeti Heowá, Bungiu le gúndaabei. Gayarabei hayarafadun lun ánhadün ayarafada houn lumutuniña (Ebüréu 10:24, 25). Ánhadün asigira áfaagua lun hadügüni lugundan Heowá, hibihibei ibagari le inarüniti: ibagari magumuchaditi. Hayarafadun lun Bungiu, ligía katei buítimati le gayarabei hadügüni. Aliiha huméi 1 Timotéu 1:11 luma 6:19.