SEKSIÓUN 4

Ida luba lahandilihóun seinsu lau lichú aau?

“Derebugugüdawati aransehani lau aban eweridihani buiti.” (Ariñawagúni 20:18)

Sun wagía mégeitiwa seinsu lun wíchuguni le hemegeirubei waduheñu houn (Ariñawagúni 30:8). Lau sun luwuyeri, “óunigihati [...] seinsu” (Apurichihati 7:12). Anihein dan hénrengu lan ladimurehóuniwa luagu ida luba lan lahandilihóun seinsu le ebelurubei múnadoun, gama lumoun mígira humá lun lanügün tema le turobuli lidoun hibagari keisi maríeitiña (Éfesuna 4:32). Lunti hafiñerun huougua lun desidírü humani úara kaba lan idan hagastarei seinsu.

1 SAMINA HUMÉI KABA LAN HADÜGA

LE TARIÑAGUBEI BÍBÜLIA: “Anhein aritagua aban hídangiñe ladügün aban wáyelesi, mañuurunbei funagia furumiñe asaminara átiribei lan lagastarun lun larihini anhein gabafubei lubéi lun lagumuchuni?” (Lúkasi 14:28). Súdiniti húaradun huguya biángubei ida luba lan hayusuruni hiseinsun (Amosu 3:3). Ariha huméi ka lan hemegeirubei hagañeinhan luma átiribei lan gayara hagastarun (Ariñawagúni 31:16). Mama ladüga lóustaruba lan hiseinsun lun hagañeinhan aban katei lun hagañeihabei lan. Áfaagua humá lun mádaragun humá hungua lidoun dúeiti, lídangiñerügüla seinsu le aniheinhalibei huma hagastara (Ariñawagúni 21:5; 22:7).

LE GAYARAABEI HADÜGÜNI:

Anhein ígiragua murusun seinsu hun lidoun lagumuchun hati, desidírü huméi úara ida luba lan hayusuruni
Anhein móustarun, ariha huméi ka lan gayaraabei hadügüni lun míbedigia lan hagastarun. Aban hénpulu, gayaraati hábouguni heigin húbiñe lubaragiñe hagañeihani ǘmada

Aban feru maríeitiña akutiha luagu létima ídanbei hagastara

2 ARIÑAGA HUMÉI INARÜNI ANI ARIHA HUMÉI SEINSU KEISI LUBUDUBU

LE TARIÑAGUBEI BÍBÜLIA: Adüga huméi sun katei lau arumani, “mámarügü ligibugiñe Wabureme, hagibugiñe giñe gürigia” (2 Korintuna 8:21). Ariñaga huméi inarüni tun hani weiriou o weiriei libügürü átiriñein lan hagañeirun luma átiriñein lan hagastarun.

Álügüdaha humá tuma hani weiriou o weiriei furumiñe sagü desidírübadün lan aban katei súdiniti le luáguti seinsu (Ariñawagúni 13:10). Lídehaba hayanuhan húmagua luagu tema le lun ñein lan darangilaü lidan hibagari keisi maríeitiña. Ariha huméi seinsu le hagañeirubei kei haseinsun tílana huban, mámarügü kei hiseinsun (1 Timotéu 5:8).

Harihiñoun aban feru maríeitiña lísüta to lauboun katei burí le lunbei hagañeihani

LE GAYARAABEI HADÜGÜNI:

Belú humá lidoun úarani libügürü átiribei lan gayara lagastarun kada aban hídangiñe sin lálügüdahan luma le aban
Magurabaha humá gaturóbulin humá luagu seinsu lun hadimurehan luagu tema le