Ka asansirubei lidan habagari maríeitiña lárigiñe nasirua lan haráü?

Gayaraati lanügün nasirua lan furumiñeti hasaani aban feru maríeitiña dandu ugundani kei idiheri houn. Másiñati taweiridun hanigi lau harihini gibe lan dan luma erei emegeirúti lun hetenirun lun hasaani. Gayaraati giñe ladügün lilouguan arumuguni luma lasansiragun ligaburi hasandiragun houngua lun mabuidun lan léibugun katei haganagua. Ligíati mosu lubéi hadügün hagía biángubei asansiruni lidan habagari lun hóunigiruni hasaani luma habagari keisi maríeitiña. Ida luba líderagunün adundehani le tídanbei Bíbülia iñuragua lídangiñe lénrengunga burí le?

1 HECHU HUMÁ LUAGU LE ASANSIRUBEI

LE TARIÑAGUBEI BÍBÜLIA: “Le hínsiñehabubei gaguraasunti, areidati [...], mámarügüñein luougua laritagua; magañidunti” (1 Korintuna 13:4, 5). Kei furumiñe lubéi wéiyaasu úguchuru humá, gunfurandawati lúntimaaba lan hisaani hetenira. Gama lumoun, gayaraati ladügün lira lun lasandirun hani weiriei mabahüdün humaali lan, ligíati mabulieida huméi megei lan giñe hetenirun lun. Lau gurasu luma ínsiñehabuni, gayaraati harufuduni lun megei humá líderagunün óunigirei irahü ani teinki humani le ladügübei.

“Huguya [...] wügüriña, áfaagua humá lun gunfuranda humaniña húmarigu.” (1 Féduru 3:7.) Anhein aban lubéi iseri úguchili huguya, gunfuranda huméi tayusurubei lan hani weiriou liibe-agei tere lun tetenirun lun irahü ani gayara lan ladügün iseri tani buligasion lun ménrengun lan teferidiruni tuguraasun, tasandirun lubucha uagu o tabuinchun lau íruni. Másiñati ñeinbei lan dan tagañidun huma, gama lumoun, meferidira huméi huguraasun, lugundun “buítimati lágüdaagun gürigia lungua sügǘ lau lagañeirun uburugu burí” (Ariñawagúni 16:32). Houcha humá gunfuranda humanu ani ru huméi le temegeirubei tun (Ariñawagúni 14:29).

LE GAYARAABEI HADÜGÜNI:

• Úguchili: Íderagua humóun hani weiriou óunigirei irahü, íbini guñoun. Mayusura huméi sun hidaani lidan burí amu katei, gayara láamuga haganwoundagüdüni dan le hásügürübei tuma hani weiriou luma luma hisaani

• Úguchuru: Danme lariñagun hani weiriei hun líderaguaadün lan óunigirei irahü, mamahara humá. Anhein madügün lubalin kei lubeibei, mayanuha humá wuriba luagu, arufudarügü huméi lun ida luba lan ladügüni

2 BUIDUTIMALÁ HANAAGUN HUNGUA

LE TARIÑAGUBEI BÍBÜLIA: “Ítara haba [...] kei ábanrügü gürigia” (Agumesehani 2:24). Lau sun aniheinhali lan aban iseri tílana muna, mabulieida huméi ítaramemegidün lan kei “ábanrügü gürigia” huguya tuma hani weiriou o weiriei. Adüga huméi sun hiyaraati lun derebugumeme lan hibagari keisi maríeitiña.

Maríeitu, teinki huméi ídemuei le líchugubei hani weiriei hun. Gayaraati lagaranihan dimurei burí le ariñawagúti lau geteingiradi (Ariñawagúni 12:18). Maríeiti, ariñaga huméi tun hani weiriou weiri lan tínsiñe hun ani gebegi tan hun luma sun le tadügübei hawagu tílana huban (Ariñawagúni 31:10, 28).

“Moun lumuti wáluahani le buídubei woungua, lunti wáluahani le buídubei houn amu.” (1 Korintuna 10:24.) Adüga huméi le buídubei tun hani weiriou o weiriei súnwandan ani gebegilá sun áfaaguni le tadügübei o ladügübei hun. Direi humá dan lun hadimurehan luma lun haganbaagun hungua. Mámarügüla huouguoun hasaminara lidan luáguti agamariduni. Samina humá luagun le temegeirubei hani weiriou o weiriei. Dariwati gumadi le tidan Bíbülia: “Lunti lagunfulirun wügüri tuma lúmari keisi úmari, lunti giñe tagunfulirun würi luma túmari keisi úmari [...], ánhaüngubeirügü adüga daradu” (1 Korintuna 7:3-5). Ligíati, adimureha humá furangu luagu katei le. Ladügüba gagurabaguadi humá luma gunfuranda humá lun lederebugudun hibagari keisi maríeitiña.

LE GAYARAABEI HADÜGÜNI:

• Mabulieida huméi hásügürün dan húmagua huguyarügü biángua

• Arufuda huméi lau burí lirahüñü katei, kéiburi aban tiraüraü gárada o idewesei, hínsiñegua humá hungua

3 ARUFUDAHA HUMÁ LUN HISAANI

LE TARIÑAGUBEI BÍBÜLIA: “Subudi [bumutu] Lererun Bungiu lúmagiñe biñüraü. Tidan [...] ladarirúa sun lichú aau le busenwabei lun [...] hasalbarun gürigia” (2 Timotéu 3:15). Samina huméi ida luba lan harufudahan lun hisaani. Gabaroun huméi weiri lan ubafu le luágubei irahü lun lafurendeirun, íbini lubaragiñe nasirua lan. Aban hénpulu, gayaraati lasubudiruni humalali lúmagiñe turageirugugiñe lúguchu gayara ligía lasandiruni ugundani o íruni le hasandirubei. Aliiha humá lun lúmagiñe lágurahoun, lugundun, íbini úabei lan gunfurandalani le aliihóubei, gayaraabei lídehan lira lun línsiñedun aliihani lun danme le laweiridun.

Masaminara humá wéirigili lan liñüraü hisaani lun harufudahan lun luagu Bungiu. Furíei humá lun Heowá ligibugiñe (2 Lúrudu 11:19). Íbini danme háhurerun luma, ayanuha humá lun luagu burí katei le adüga láalibei Bungiu (Sálumu 78:3, 4). Éibume aweirideina lan hisaani íchigeina luba fe hínsiñe lan Heowá hun, ábame giñe línsiñedun lun.

LE GAYARAABEI HADÜGÜNI:

• Furíei humá lun hamuriaha lichú aau luma Bungiu lun hagüriaruni hisaani

• Águyuguagüda huméi dimurei burí luma saminaü le súdinibei lun hisaani furendeigia láamugei