Lagumeserun aban iseri ubóu hau widü gürigia

Lárigiñe lebelurun Noé, liduheñu hama animaalugu tidoun árüka, aba ladouruni Heowá bena, ábati lagumeserun huya áhuya. Hanarimeti láhuyun huya darí lun tagumeserun árüka áfayara. Chülüti dan lun ladouragun duna lau sun múa. Hilatiña sun gürigia wuribatiña ha bóugudibaña tuéi árüka. Ánheinti lun Noé luma houn liduheñu masuseredunti ni kata tidan árüka. Ma funa lueirin hagundan ladüga meha gaganbadi hamá lun Heowá, adián?

Áhuyati saragu huya luagu 40 weyu luma 40 áriebu, lárigiñe, aba lásügürün. Lau lásügürün dan, aba lararirun duna. Ábati tadagarun árüka ligibuagu aban wübü. Rédeiti Noé hama liduheñu tidan árüka luagu fiu dan ladüga gíbegili lan meha duna bóugudi.

Lau lásügürün dan, aba lamabeidun múa. Lóugiñeñein aban irumu lau Noé hama liduheñu tidan árüka. Ábati lariñagun Heowá houn gayaraahali lan háfuridun. Aban meha larihíniwa ubóu kamá hamuga iseri! Kei weiri lubéi meha heteingiruni Heowá luagu lasalbaruniña, adügatiña aban adagaragüdüni lun.

Gúndaati Heowá lau adagaragüdüni ligía, ábati füramase lan houn magünrinchagundigia laali lan ubóu lau guran. Adügati lun tasaliragun aban heremuru luagu furumiñeti wéiyaasu sielu, le aubei larufudei houn lagunfulirubei lan füramasei ligía. Arihañahaadibu san aban heremuru?

Ariñagati giñe Heowá lun Noé luma houn liduheñu lun gasaanigu hamá lun habuinchagüdüni ubóu.