Gaganbaditi Abüraámü tuma Sara lun Bungiu

Yarafa lun Babeli, anihein meha amu uburugu gíriti Uru. Máhuduraguntiña meha lílana uburugu ligía lun Heowá, houn meha amu búngiugu háhuduragua. Ánheinti Abüraámü, aban meha hádangiñe gürigia ha uburugubaña Uru, huduguati lun Heowá.

Ariñagati Heowá lun Abüraámü: “Ígiraboun buban hama biduheñu, beiba lidoun fulasu le lunbei narufuduni bun”. Lárigiñe, aba füramase lan Bungiu lun: “Hachülürüba badügawagun lun aban hamá óunwenbu néchani. Ani bídangiñeba nadüga saragu katei buiti hawagu gürigia ha lídangiñetiña sun ubóu”.

Lau sun meha ibidiñe lan lun Abüraámü haliñounba lan lóunahei Heowá, ru lumuti lafiñen luagu. Gaganbaditi Abüraámü tuma Sara, to lani weiriou; Taré, le lúguchi luma Lotu, le libase, lun Bungiu, ábati hagumeserun aranseha lubá lidise haweiyasun.

Ǘrüwa-wein meha keinsi irumu lau Abüraámü dan le lachülürünbei hama liduheñu lidoun fulasu le labusenrubei Heowá larufudun houn. Kanán meha líribei fulasu ligía. Ñein ladügei Heowá füramasei le lun: “Níchugubei sun múa le houn badügawagun”. Kei wéiyaali lubéi meha Abüraámü tuma Sara ani masaanigutiña, ida luba méhati lagunfuliruni Heowá füramasei le?